Ka kynhun kieng atiar, ka Hynniewtrep National Liberation Council (HNLC) hynne ka sngi, ka la pynpaw ka jingsngewkmen ia ka jingithuh ia ka ktien Khasi da u Google bad pyni ia ka jinglong kongsan ban pynneh ia ka ktien tynrai bad ban pynrung noh ia ka ktien Khasi bad Garo ha ka kyrnit ba phra jong ka riti synshar ka ri. Katkum ka kyrwoh na u General Secretary bad Publicity Secretary ka HNLC u Bah Sainkupar Nongtraw ula pynpaw ba ka HNLC ka sngewkmen ia ka jingpynbna ia ka jingithuh ia ka ktien tynrai Khasi da ka Google bad kane ka pyni ia ka jinglong kongsan ban iada bad lehkmen ia la ka ktien ka thylliej ba la hiar arsut ha ka juk mynta.Ula ong, ka jingithuh ka pyni ia ka jingpyrshang jong baroh ban iakhun ban ioh noh ia ka jingithuh da ka Sorkar India ia ka ktien Khasi bad ka long kaba kongsan ia ka Sorkar India ban ai jingithuh bad kyrshan ia ka ktien Khasi khnang ba yn lah pynkhlain ia ka riti dustur, ban kyntiew ia ka bha ka miat ka Jaidbynriew bad ban iada ia kane ka ktien ka thylliej tynrai.
Ha kawei ka liang, ka HNLC ka la pyrpad ia u Myntri Rangbah ka jylla ia ka Google ban ai jingthuh lang ia ka ktien Garo ka la pynkyndit halor kane ka jingshimkhia ka jong u, hynrei kaba kongsan ka long ba u Myntri Rangbah u dei ban pynleit jingmut ban kyrpad ia ka Sorkar Pdeng ban kynthup lang noh ia ka ktien Khasi bad Garo ha ka khyrnit ba phra ha ka jaka ban kyntiew ia ka jingkwah ban myntoi shimet. U Bah Saiñkupar ula ong ka jingpulom ka sorkar pdeng ban ai jingithuh ia ki ar tylli ki ktien tynrai ka jylla, ka pyni ia ka jingthmu ban niewbeiñ, pynduh jait bad pyndkut ia u saibteng jong ka jaidbynriew na ka tynrai ka jong kaba ia dei bad ka pule puthi da ka ktien tynrai.
Ula pynpaw ba napdeng jong ki 7000 tylli ki ktien ba la kren ha kylleng ka pyrthei bad napdeng ki 700 tylli ki ktien hapoh ka ri India, ka ktien Khasi ka la ioh ia ka jingithuh da ka Google Translate bad kane ka dei ka histori. Ula ong, ba ka UNESCO ha u snem 2012 ka la ai jingithuh ba ka ktien Khasi ka dei ka ktien kaba don jingma kaba lah ban duh jait noh, hynrei ban pynneh pynsah ia ki ktien tynrai kan shong ha ki kti jong ka sorkar pdeng da kaba ai jingithuh noh bad ka jingkylli ka long haduh katno ki ktien tynrai kin dang long kiba shngaiñ khlem ka jingioh jingithuh na ka sorkar.
