U MLA ka BJP u bah Alexander Hek ula ong ba ka party ka don ia ka jingangnud ban iakhun ia ka ilekshon shiteng samoi na Gambegre.
Ka ilekshon shiteng samoi kan long ha Gambegre konstitwensi na ka daw ba u Saleng A Sangma na ka Congress ula iehnoh ia ka kam MLA hadien ba ula jop kum u MP ka Tura.
U bah Hek u la ong ba ki la don ki kyrteng kiba iakren bad u nongialam ka BJP uba dei ruh u MDC, u Bernard R Marak, ula paw kyrteng tangba ka rai kan shong ha ka party.
“U President Rangbah ka BJP, kumjuh uba peit ia ka Meghalaya, ki thrang eh ban iakhun ia kane ka ilekshon shiteng samoi na Gmbegre”, la ong u bah Hek.
Halor ka jingshah rem ki kyrtong ba kyrshan ka BJP na Shillong bad Tura Parliamentary, u bah Hek u la ong ba kane kam dei kaba jia tang ha ka BJP hynrei ka jia ruh ha kiwei ki seng sain pyrthei.
Ula ong ba ka party kan sa shong pyrkhat ban iakren halor kane ka mat.
U bah Hek ula ong ba watla ka Congress ka jop ha ka MP hynrei kan nym don kano kano ka jingsyier namar ba ka ilekshon MP bad ka ilekshon MLA, MDC ki iapher.
“Ka MP kam ia dei eiei bad ka MLA ne ka MDC ilekshon, bad ki iapher kawei ia kawei ka elekshon”, la ong u bah Hek.
