Ka jingkhang ka dang plie ban iakren iasuk bad ka HNLC: Claudia Lyngwa

Ka Deputy Inspector General of Police (TAP) ka Kong Claudia Lyngwa ka la ong, katkum ki jingtip ba la ioh lum da ki pulit, ka kynhun kieng atiar kaba la shah khein be-aiñ ka Hynniewtrep National Liberation Council (HNLC) ka don kumba 20 – 30 ngut ki dkhot. Haba iakren bad ki nongthoh khubor ka Kong Claudia Lyngwa ka la ong, ruh ba ym lah pat ban tip ba ka HNLC ka don ia ki tiar siat kiba kumno shathie hynrei hangne ki don ia ki tiar kiba malu mala. “Ka jingkhang ka dang plie ban iakren iasuk bad ka HNLC.

“Ngim don eiei na ka liang jong ngi ba kane ka jingiakren iasuk kan ym bteng shuh, hynrei kan iai bteng bad ka jingkhang ka dang plie beit” ong ka Kong Claudia bad ka bynrap “Ka jingiakren iasuk kan iaid shakhmat bad lada don kino kino kiba leh ia ki kam beaiñ kumta ngin hap ban leh ia kaba donkam pyrshah ia ki”. Ka DIG ka la iathuh ba bun ki briew kiba ioh pdiang ia ki shithi dawa pisa hynrei kim wan pat ban ujor ha ki pulit bad kala maham ia ki paidbah kiba noh synniang sha ka HNLC namar kin shah pynngat ha ki kyndon aiñ. Kala iathuh na ka mobile phone jongu PSO ka HNLC u Bah Storgy Lyngdoh uba la shah kem ha ki pulit, la lap ba kila don bun ngut ki briew kiba la shah dawa pisa.

Halor ka jingsaphriang ki khubor ba u Bah Storgy u wan ban pyndem wait, ka DIG kala ong, “Une u briew ula leit sha Bangladesh bad kane ka long kaba sngewthuh shai, ba lada u kwah ban pyndem wait, ula don beit hapoh Nongbah Shillong katba ka sorkar ka dang iakren, kumta na ka jingsngew ka jong ngi ka jingleit phai biang ka jongu sha Bangladesh bad ban wanphai na Bangladesh, kaba mut kumno. Nga ieh ha ka jingsngewthuh ka jong phi”. Kala iathuh ba kam shym la don ka jingdawa pisa na ka liang jongu hynrei na ka phone ka jongu la shem ba kila don bun ki phone number bad kila don bun ki briew kiba la shah dawa pisa bad ka jingtohkit kan dang iaid shakhmat.