Ka kynhun ki Local Truck Owners and Drivers Association ki la pynpaw ia ka jingeh halor ka jingkhang syndet ka sorkar jylla ia ki trok ban kit shyiap kit maw ha kylleng ki jaka. Haba kren sha ki lad pathai khubor u President kane ka kynhun u bah Egenstar Kurkalang, ula ong ba ka sorkar jylla lyngba ka tnad Forest, ki la wan ban khang ia ki parmaw par shyiap bad ka la pynsahngeh ia ki trok ha kiba bun ki bynta ha East Khasi Hills kynthup ha ki jaka Laitkor, Umphyrnai, Laitkroh.U bah Kurkalang ula ong ba ka jingwan khang syndet ka sorkar ban kit shyiap kit maw ka la ktah ia kiba im kamai jakpoh na kane ka kam bad ka la ktah ruh ia ki jingpyntrei jong ki riew shimet bad kumjuh ki project sorkar bad ka jingpyntrei ia ka skhim shispah sngi.
“Ka tnad ka khlem pynshai ei ei halor kane ka jingpynsahngeh hynrei la shu wan kyndit ban khang ia ki kali,”ula ong. Katkum ka jingong u bah Kurkalang ka sorkar ka khang da kaba pyntreikam katkum ka ain Meghalaya Minerals Prevention of Illegal Mining Transportation and Storage Rules, 2022. Kaba sngew lyngngoh ka long ba tad haduh mynta kane ka kynhun kim don jingtip ba don kane ka ain tad haduh mynta ba la sdang ban wan ban khang, namar ka sorkar ha shwa ba kan pyntreikam ka khlem pynshai eiei sha ki. Ula ong, “Kam shym la don ka jingpynshai ia ki trai kali ba don kane ka ain ba ym long ban kit ne ban die khlem ka challan kiban ai da ki trai par maw ne trai par shyiap. Ha ka jingshisha ha shwa ba ka sorkar kan thaw ne pyntreikam ia kane ka ain , ki ladei ban pynshai shwa namar bun mynta ki shu sah ha ka umdum.”
Ula ong ba na ka liang ka kynhun, ha shwa ban wanrah ka jingeh kaba kham jur, kin pynlong ia ka jingiakynduh jong baroh ki trai kali bad ki draibar kiba kit maw shyiap ha ka 8 tarik ha shnong Umphyrnai ha ka por 10 baje mynstep bad na kane ka jingialang kin sa shim ia ka rai ba kin iaid shakhmat. Na ka liang kane ka kynhun ki nongniah trok ki la dawa ba ka sorkar ka dei ban ailad shwa shipor ia ki kali ban iaid lane ban khot ia ka jingiakren ban iapynbeit da kiwei ki lad ki lynti.
