Ka IIM Shillong bad ka State Institute of Rural Development & Panchayati Raj (SIRD&PR), Arunachal Pradesh ki la iasoi ia ka jingiatehkular (MoU) ban iatreilang halor ka jingthmu ban pynkylla dur bad ban kyntiew ia ki kam nongialam bad ki bor pyniaid hapoh jongki Panchayati Raj Institution (PRI) ha Arunachal Pradesh. Ia kane ka MoU la soi da u Prof. D.P. Goyal u Director jongka IIM Shillong bad u Dr. S Dr. Sonal Swaroop, IAS, Secretary Panchayati Raj-cum-President Executive Council, SIRD&PR.
Kane ka jingiatreilang ka pyni ia ka sienjam kaba kongsan ban pynkhlain ia ka jingsynshar bad jingtreikam jong ki kam pynroi ha ki thain nongkyndong bad ka Panchayati Raj ha ka thain. Ka jingthmu ba kongsan jong kane ka MoU ka long ban buh ia ki kyndon ban pyntreikam ia ka Management/Leadership Capacity Building Program. Ia kane ka prokram la pynwandur ban kyntiew ia ka jingtbit bad jingnang jingstad jong ki nongmihkhmat kiba la shah jied, ki ophisar bad ki nongtrei jong ki Panchayati Raj Institutions (PRI) ha kylleng ka Arunachal Pradesh.
Kane ka sienjam ka thmu ruh ban pynkup ia ki nongialam shnong da ki sap nongialam bad pyniaid ia ki kam kiba kham shalor bad kiwei kiwei bad ban pynbha ia ka jingpyniaid ia ki kam Panchayat. Kane ka jingiatreilang ka thmu ban iasam lang na ka bynta ban kyntiew ia ka jingsynshar bad jingshakri ha ki thain nongkyndong ban kyntiew iaka sap long nongialam ha ka imlang sahlang bad ban kyntiew ia ka roi ka par ha kylleng ka jylla Arunachal Pradesh.
