Ka jingkieng iaid kjat ha Tuber Kmaishnong kan iarap ia ki nongrep bad khring kam jngohkai

Ka jingkieng iaid kjat batip kum ka Suspension Bridge kaba don ha shnong Tuber Kmaishnong East Jaiñtia Hills District, kaba jam na shiliang sha shiliang ka wah Myntdu la plie paidbah ia ka ha ka 31/01/2024 da u Kyrmen Shylla myntri ka tnat Revenue & Excise ka sorkar Jylla ha ka jingialang ba la pynlong ha madan dai cha harud katei hi ka jingkieng ryngkat ka jingdonlang u Dy CEM ka JHADC u Lasky Rymbai, u A.Baranwal DC East Jaiñtia Hills District, Dr.T.Shylla BDO Khliehriat C&RD Block, G.Warjri additional DC East Jaiñtia Hills, ka Tourism Officer Jaiñtia Hills, S.D Shylla, u waheh shnong Tuber Kmaishnong Micky Lyngdoh bad kiwei.
Ia kane ka jingkieng la shna haka jinglut kumba 95 lak lyngba ka skhim MGNREGA jong u snem 2023-2024, kumjuh ruh lyngba ka pisa naka District Minerals Fund PMKKKY bad MBDC Fund.
Ka jinglah ban shna pyndep ia kane ka jingkieng kaba jrong haduh kumba 120 meter kan iarap nyngkong eh iaki nongrep haka por lyiur ban jam na shiliang sha shiliang ka wah.
Ha kajuh ka por lyngba ka jingitynnad kane ka jingkieng, ki lum ki wah bad ki sawdong sawkun jong kane ka jaka kan khring ruh iaki paidbah nongjngohkai.
U Kyrmen Shylla haba kren u iaroh ia baroh kiba don bynta ban pynlong ia kane ka jingkieng kaba jop bad ka jinglah ban shna pyndep kan long ka jingkyrkhu bakhraw iaki paidbah nongrep kiba hap ban jam sha shiliang ka wah Myntdu khamtam haka por lyiur.
U ong ruh kane ka jaka ka long kaba biang bad itynnad naka bynta ka jingpynmyntoi ka shnong ka thaw haba iadei bad ki kam jngoh kai, kumta naka liang jong u ryngkat bad ki nongialam shnong kin sa shong pyrkhat da kiei de ba donkam ban leh haba iadei ban kyntiew iaka kam jngohkai.