Hadien ka jingsynjor ka jingkieng Damsite bad ka jingshah khang ki kali heh ban iaid na katei ka jaka, kumta ka tnad PWD Road ka don ia ka jingthmu ban tei ia ka surok bad ia ka jingkieng kaba thymmai ban pynsuk ia ka leit ka wan jong ki kali heh. Katkum ki tyllong khubor ba la ioh lum na ki ophisar ka tnad PWD ki la iathuh ba ka tnad ka la shimkhia ban wad ia ki lad ki lynti ban shna noh da ka jingkieng kaba thymmai khnang ba ki kali rit bad ki kali heh kin lait ban iaid na ka jingkieng Damsite. Ki la iathuh ba ha ki snem ba la dep, ka don ka jingtyrwa ban shna noh ia ka jingkieng thymmai na ka bynta kaba shaneng jong ka jingkieng Damsite hynrei kane ka jingthmu ka la pulom noh, hadien ba ka jingbym ioh jingbit na ka Geological Survey of India namar ka lah ban pynsynjor bad buh kylla ha ka jingma ia ka jingkieng Damsite kaba la don lypa. Kum ban shu pynkynmaw u Symbud Myntri Rangbah ka jylla u Bah Prestone Tynsong ula kren ha ki bnai ba la dep, ba ka sorkar jylla ka don jingthmu ban shna ia ka jingkieng thymmai na ka bynta ba sharum jong ka Jingkieng Damsite bad ka sorkar jylla ka la aiti ha ka NHIDCL ba kan pynlong ia ka jingsorbe ia ka jaka ban tei ia ka jingkieng kaba jrong bad ia ka surok na ka bynta kaba sharum jong ka jingkieng Umiam.
La iathuh ba ynda la dep shna ia katei ka surok bad ia ka jingkieng ba thymmai, ki kali heh bad ki kali rit kin ioh ban iaid na ka surok jong ka Industrial Estate Umiam. U Symbud Myntri Rangbah ula iathuh teng, ba ka jingthmu ka long ban shna ia ka jingkieng na ka Industrial Estate Umiam bad na ka liang jong ka NHIDCL bad ki Agency ki dang pynlong ia ka jingsorbe ia ka jaka bad leh ia ka Soil Testing bad kin sa ai jingtip ia ka sorkar ban ioh ka jingmynjur. U la iathuh ba ka Ministry of Road Transport and National Highway jong ka sorkar pdeng kan bei ia ka jinglut jingsep baroh na ka bynta ban tei ka jingkieng bad ia ka surok bathymmai namar ba katei ka surok na Guwahati haduh Shillong ka hap ha ka National Highway.
La ioh jingtip ruh ba ka Tnad Transport ka la kyrpad ia ka tnad PWD ba kan pynkloi ia ka jingshna ia kawei pat ka surok khnang ba ki kali heh kin ioh ban pyndonkam ia ka Inter State Bus Terminus (ISBT) kaba don ha Mawlai Mawiong, namar kumba long mynta ki bos heh kim ioh iaid shuh na ka jingkieng Damsite bad kumta ki la hap ban ieng noh ha Umiam ban kit ia ki nongleit jingleit sha kiwei pat ki jaka.
