Hadien ka jingmih noh u Dr. Celestine Lyngdoh u MLA ka Umsning Konstituensi uba la jop na ka Congress ban leit ai jingkyrshan ia ka party National People Party NPP ba ialam ia ka sorkar Meghalaya Democratic Alliance (MDA) ka long ka jingsngewsih bad diaw mynsiem ia ki paidbah nongkyrshan bad kumjuh ruh ia ki nongkitkam ki unit bapher bapher hapoh ka Umsning Block Congress Committee. Halor katei ka jingmih u MLA na ka party Congress, mynta ka sngi ka 21 tarik Nailar 2024, na ka liang ki nongialam ka Umsning Block Congress Committee ka la lum ia ka jingialang ba kyrpang ha Umsning na ka bynta ban ai ia ka jingpynshai sha ki paidbah nongkyrshan ka party halor katei ka jingmih noh u MLA jong ki. Haba kren sha ki lad pathai khubor hadien ka jingialang, u President ka Umsning Block Congress Committee bah Rocky Marwein ula pynpaw ka jingsngewnguh ba nyngkong ia u Blei namar ha kane ka sngi ka Umsning Block Congress Committee ka la buh ban pynlong ia ka Central Executive Committee ha kaba ki nongkitkam ka Umsning Block Congress Committee na baroh ki area ki la wan poi sha ka jingialang. U bah Rocky Marwein ula iathuh, ia kane ka jingialang la buh tang hadien ba ngi la iohi ia ka jingmih noh u MLA ka Umsning Konstituensi u Dr. Celestine Lyngdoh uba la jop na ka Party Congress ula leit ban pyniasoh ialade sha ka party National People Party bad la lum ruh ia kane ka jingialang khnang ba kin ioh ban ai ia ka jingpynshai sha baroh ki nongkyrshan bad ki nongialam ha ki Unit bapher bapher jong ka party Congress halor katei ka jingmih noh u MLA ka Umsning.
Ka jingleit iasoh NPP u MLA jong ngi ka dei ka rai shimet, la ong u bah Rocky. Shuh shuh u bah Rocy ula iathuh ba ka Party Umsning Block Congress kam don bynta eiei ha kane ka jingleit iasoh u MLA sha ka NPP bad Ki nongkitkam jong ka Umsning Block Congress Committee naduh ki Youth Congress, ki Mahila Congress bad ki nongkitkam jong ki area baroh ki dang neh hi kum ka Party Congress bad kum ka Umsning Block Congress Committee ha Umsning konstituensi. Shuh shuh u Bah Rocky Marwein ula iathuh ha ka jingialang jong ka Central Executive Committee ba la long ha ka 10 tarik Nailar, u MLA ka umsning Dr. Celestine Lyngdoh ula ong ba un leit ban kynrshan ia ka sorkar na ka bynta ban wanrah kam roi hapoh ka Umsning konstituensi namar ban shong ha ka liang pyrshang kam long kaba suk ban pynbiang ia ki jingdonkam ka konstituensi baroh kawei bad ia ki paidbah kiba ju wan ban donkam ha ophis jong u bad kane ka dei hi ka rai shimet.
U bah Rocky marwein ula Kyntu ia ki Nongkyrshan ba wat lada u MLA ka Umsning ula leit ban kyrshan ia ka party NPP, ngim dei ban duh jingkyrmen bad ngim dei ban ia rit mynsiem bad ula ong ruh na ka liang jong u kum u President ka Party lem bad u secretary lem bad baroh ki nongkitkam ki Unit bapher bapher kin iai neh hi bad ka party congress bad kumjuh ki nongkyrshan phim dei ban rit mynsiem namar ka Umsning Congress ka dang skhem, ka dang tylli bad kan nangiai trei na bynta ki paidbah jong ka konstituensi.
