Ka Director General of Police (DGP) ka jylla ka kong Idashisha Nongrang, ka la ong ba ha ki snem ba la dep ka jinglum pisa beain ki pulit ha ki surok bah ka la jur bad kane ka la pynduh thiah pynduh dem ia ka ophis treikam ki Pulit bad ia ka Secretariat. Haba kren mynta ka sngi sha ki lad pathai khubor, ka kong Nongrang ka la ong ba kum kine ki jaitkam be-ain ym lah ban iai shah bad lada donkam yn shim ia ki sienjam ba tyngeh ban pynbeit ia kum kine ki kam beain. “Kum kine ki jait kam yn nym lah ban pdiang da ka tnad bad yn shim ruh da ki lad ki lynti ban pynbeit ia ki jingbakla,” ong ka DGP ka jylla ka kong Nongrang.
Ka la ong ba ia mynta kam pat lah ban kular ban pynduh syndon ia kum kine ki jait kam khrong pisa beain hynrei kan pyrshang iakhun ban pynduh jait ia ki kam be-ain. Ka kong Nongrang ka la ong ba kum kine ki jingkhrong pisa beain ka pynjah burom ia ki paidbah bad ia ka jylla baroh kawei. “Ki jingkhrong pisa beain kim dei shuh ban don bad nga kyrmen bad ngin pyrshang ban pynduh jait,” ka la ong. Ha kajuh ka por, kong Nongrang ka la ong ba kum ka ophisar kynthei kan pyntikna ba ki khynnah kynthei ki longkmie kin don ka jingshong shngain ha ka jylla.
Haba kren sha ki lad pathai khubor mynta ka sngi ka kong Nongrang ka la ong ba kan trei kham bha haba iadei bad ki kam shah thombor pyrshah ia ki khynnah ki kynthei bad ka la buh thong ba kan pynneh ia ka shongsuk shongain bad yn tehakam pyrshah ia ki kam thombor ki kam runar. Ka kong Nongrang ka la ong ba watla ha ki snem ba ladep ka tnad pulit ka la pyrshang ban tehlakam ia ki thombor bad ki kam runar, hynrei kat dang mih ki sngi ka dang kiew ki kam thombor ki kam sniew ha kane ka jylla. “Ban tehlakam pyrshah ia ki kam thombor, ngin pyrshang ban iasyllok bad kiwei ki kynhun sha kiwei ki District ha kylleng ka jylla,” ka la ong.Ka la ong ruh ba donkam ban pyrkhat bad ban pynbeit thymmai ia ka rukom treikam ban pyrkhat ban tehlakam ia ki kam sniew ha kane ka jylla. Katkum ka DGP ka tnad pulit kan pynleit jingmut bha bad kan khmih bniah pyrshah ia ki kam thombor ia ki Kynthei khamtam haba iadei bad ki mukotduma POCSO.
