Ka Jowai Presbyterian Higher Secondary School hynne ka sngi ka la pynkut ia ka jinglehkmen dap 25 snem ka jingiaid lynti jong ka ban sam jingnang jingstad, ha ka jingialang ba la pynlong ha Jubilee Hall ka Balang Presbyterian Jowai ba la wan sakhi lang da u MP ka Rajya Sabha u Dr.W.R Kharlukhi kum u kongsan, u MLA ka 2-Jowai u Wailadmiki Shylla kum u symbood kongsan ha ka jingdonlang u Dolloi ka Elaka Jowai u Puramon Kynjing, ki Pastor ba kynthup u Rev.E.Nongpluh, Rev. B.B.Lamin, Rev.C.L
Laloo, ki tymmen basan, ki nonghikai, ki khynnah skul barim bad kiba dang pule nangta kiba shah khot sngewbha bad kiwei.
U Wailadmiki Shylla haba kren ula iaroh iaki bor pyniaid namar ban pyniaid iaka skul kam dei ka kam ba suk, ha kaba wat daka sorkar ruh ka dang shem jingeh.
Te kumba ka skul kala pynsngew ruh iaki jingdawa ba donkam lyngba ki memorandum ba kila aiti ha u kumjuh ha u MP, ula kular ba katba lah un sa pyrshang wad ki lad ha ryngkat ka jingiatreilang bad u MP.
Na ka liang u kongsan u Dr.W.R. Kharlukhi haba kren u ong, kane ka jingdap 25 snem ka skul ka pynkynmaw ia u ia ka jingdap 175 snem ka jingwan ka ktien u Blei ha kane ka Ri Khasi Jaiñtia, bad ka jingdap 175 snem ka balang ym dei ban lehkmen tang ia ki snem ba la dep hynrei ban kynmaw ruh ia u Blei uba la jied ia ka Ri jong ngi ban long ka jong u, bad dei namar ba u ieid eh iaka Ri jong ngi la sakhi ruh ba ngi lait shibun ki jingjia kumba jia ha kylleng ki Jylla ka Ri bad ka pyrthei baroh kawei.
Nangta ka jingioh kane ka skul ban jam sha u mawmer dap 25 ruh, u ong dei ba u Blei u iaid donlang ryngkat.
Ha kane ka sngi la plie ruh ia u maw sahnam jong ka jinglehkmen dap 25 snem ka skul, kumjuh u maw sahnam bala ioh jingiarap ka skul na u Dr.W.R.Kharlukhi lyngba ka MPLADS scheme 2024 ban shna pynheh kamra klas.
Nangta la ioh ia ka khana lyngkot ka skur na ka Principal ka I.Lytan, la pyllait iaka souvenir jong ka skul da u Rev.E.Nongpluh, la pynher iaka balloons da u Tbn.B.N.Lamare.
Bad la pynshongshit shuh shuh ia kane ka sngi da ka jingshad jingrwai bad drama lyngkot bala shim bynta daki khynnah skul, ki nonghikai bad kiwei
