Ka jingshah thombor ki Khristan ka lah ban dei na ki riew kabu ba la jan ilekshon:SAFF

Ka Shillong All Faith Forum (SAFF) ka la kyntu ia ka Sorkar Meghalaya bad sorkar Assam ban iakren pynbeit ban shim ki lad ban iada halor ki kam thombor bad shah byrngem ki riewngeit khristan ba sah ha ki thain khappud Meghalaya-Assam. Shuwa kane ka SAFF ka la pynlong ka jingialang ba kyrkieh ban iakren halor ki khubor shah thombor bad shah byrngem ki jaidbynriew khristian ha ki thain khappud. Haba kren sha ki lad pathai khubor u President ka SAFF u Bishop Purely Lyngdoh ula ong, ka jinglong jingman hapoh ka Ri India bad ka thain shathei Lammihngi khamtam ha ki thain khappud ka Jylla Meghalaya ka la sakhi ka jingshah thombor bad shah byrngem ki riewngeit.

U Bishop Purely u la ong, ba mynshwa ka thain shathei Lammihngi ka dei ka thain ba im hapdeng ka jingialong shngain jong baroh ki riewngeit watla ki don da ki spah tylli ki niam, ki riewlum, ki ktien thylleij, bad ki riti dustur.“Ka long kaei kaei kaba sngewsih ba mynta la sdang sakhi biang ka jingshah thombor bad shah byrngem ki riewngeit kiba don ha ki thain khappud ka Meghalaya-Assam” la ong u U Bishop Purely.

U la bynrap ka jingshah thombor bad shah byrngem ki riewngeit ka lah ban dei ruh na jingshim kabu da ki kato katne ngut kiba kwah myntoi shimet khamtam ba mynta ka ilekshon ka la jan bad u la kyntu ia ki paidbah bad ia ki sengsain pyrthei. “Ka SAFF ka kyntu ia ka Sorkar Meghalaya bad Sorkar Assam ba kin bteng ki jingiakren bad kin wad bniah halor ki khubor ba mih ki jingshah thombor bad shah byrngem bad ki dei ruh ban leh eiei ban tehlakam ia kum kine ki jingjia kiba thmu ban wanrah ka jingiapher niam hapoh ka ka thain bad ka ri” u la ong.