Ka jingstad kam shong ha ka iing skul building, ka shong ha ka jingtrei shitom: Rakkam

U Myntri ka tnad Pule Puthi ka jylla Meghalaya, u Rakkam A Sangma, mynta ka sngi u la leit ban pynhap noh ia ka lama jingrakhe ia ka Jubili Ksiar jong ka Nepali Secondary School kaba la long ha District Library ha Nongpoh.

Hashwa ka jingpynhap pyrda ia ka jingrakhe ia u mawmer ba 50 snem jong ka jingiaid lynti jong ka skul Nepali Secondary School, u Myntri ka tnad Pule ka jylla u la leit ruh ban jurip ia kane ka iingskul ha ka jingiadonlang ruh u Bah Mayral Born Syiem, MLA ka Nongpoh, u Manish Kumar, ADC Ri Bhoi District, u Madhav Singh President ka Nepali SS Managing Committee, ka Kong Rina Mary Hynniewta Principal nalor kiwei kiwei.

Haba kren ha kane ka sngi pynkut ia ka jingrakhe, u Rakkam A Sangma, u la ai jingiaroh shikatdei eh ia baroh kito kiba la don bynta ban seng ia kane ka shlem ai jingnang jingstad jong ka Nepali Secondary School, kiba don ka jingiohi jngai ia ka jingdonkam ban pynphriang ia ka jingnang jingstad ha ka thain Nongpoh khamtam ia kito ki khynnah kiba wan na ki longiing longsem kiba duk ba rangli.

“Ka jinglen lade naduh ki nongseng, ki nonghikai bad kito kiba don bynta ban pynieng ia kane ka shlem ai jingnang jingstad, ka long kaba seisoh mynta na ka jingiaid lynti bad ban jam sha u mawmer ba 50 snem jong ka skul, ban ai jingnang jingstad sha ki khun kane ka dong ka thain ha kaba kum kawei na ki skul ka la lah ban sei ia ki khlur kiba la phyrnai ha ka jingim ka jong ki hadien ba ki la ioh ia ka jingnang jingstad na kane ka shlem ai jinghikai”, ong u Rakkam A Sangma.

U la ong ruh, ba ha ka jinglap jong u ha ka jingleit jngoh ia kane ka iingskul Nepali SS, Nongpoh, u la shem ba kam shem pat la don ïa ka building kaba heh hynrei, u la bynrap, ba ka jingnang jingstad kam shong ha ka jingdon ïa ki Building skul kiba heh hynrei ka shong haka jingtrei shitom jong ki khynnah skul lem bad ki nonghikai, da kaba ai ruh ia ka jingkitbok kitrwiang ïaki khynnah skul, ki Nonghikai bad ïaka Managing Committee jong ka skul ba kin dang ïai trei shitom ban sei ïaki khynnah pule kiba stad bad kiba shemphang.

La pynphuh pynphieng ruh ha kane ka sngi ba la pynkut ia ka jingrakhe ia ka Jubili Ksiar jong ka Nepali SS, da ka jingiashimbynta jong ki khynnah skul bad nonghikai ha ki jingshad jingrwai bad ki jingput jingtem bad la pynlait ruh ia ka Souvenir jong ka jingrakhe Golden Jubilee ha ryngkat ka jingpynkup burom ia ki katto katne ki nonghikai bad khynnah skul.