Ka Director General of Police (DGP) bathymmai ka jylla ka Kong Idashisha Nongrang ka la ban jur hynne ka sngi ia ka jingdonkam ban trei shitom ban pynneh ia ka shongsuk shongsaiñ, ban tehlakam bad ban lap ia ki kam sniew, ban iakhun pyrshah ia ki kam thombor ia ki kynthei kum ki mat kiba hakhmat eh. Haba iakren bad ki nongthoh khubor ka Kong Nongrang ka la ong, ba ka kamram jong ki pulit ka long ban pynneh ia ka shongsuk shongsaiñ, ban pyrkhing bad ban lap ia ki kam sniew bad kin pynleit jingmut bha halor kitei ki bynta. Kala ong, ruh ba kan phaikhmat bha ha kaba iadei bad ki kam syntiat hynrei kam shym la treh pat ban batai bniah halor kane ka mat tangba kala pynpaw pat ba ka long kaba donkam bha ban phaikhmat sha ka kam syntiat namar khlem ka kam syntiat yn ym lah ban trei pyndep ia la ka kamram hauta u pud kumba ki pulit kidei ban trei ia ka kam ka jongki.
Ha kaba iadei bad ka jingjyllei u drok ha ka jylla, ka DGP kala ong ba ka nongbah Shillong ka long tang ka jaka kaba pyniaid lynti ia u drok hynrei mynta kala kylla long kum ka jaka jong ki nongdih bad watla ki pulit kila ioh ban kurup bun bah u drok hynrei kim shim la lah pat ban pynsangeh ia katei ka kam khaii.Ka la iaroh ruh ia ka jingtrei shitom ka tnad Anti Narcotic Task Force (ANTF) ha kaba kala ioh ban kurup bun bha ia une u jingdih uba sniew. Ka Kong Nongrang kala banjuria ka jing donkam ban iatreilang da ka jingiajan ym tang bad ki bor aiñ hynrei bad kiwei kiwei ki kynhun kiba donbynta lang ha kaban iakhun pyrshah ia u drok.
“Ngi donkam ban ngam jylliew ha ki longiing longsem namar kawei kaba nga la iohi bha shaphang jong ngi, kadei ba ngi sngewtynnad ban kren shaphang ka jongka (drok) hynrei ngim shym la leh eiei pat na ka bynta jongka” ong ka Kong Nongrang. Halor ka jingai jingmut ba dei ban pynkhlain ia ka jingpahara ha ki jaka kiban rung shapoh ka jylla (Entry Point) ban tehlakam ia ka jingioh rung u Drok, ka DGP bathymmai ka jylla kala ong, “Kane kadei tang kawei na ki bynta ban iakhun pyrshah ia u drok. Hooid ngi lah ban bat iaki na ki Entry Point hynrei ka jingshisha ka long ba ngi don ia ki jaka khlaw kiba rben bha bad ka surokbah National Highway ruh ka iaid lyngba ka jylla, kumta ki don ki jingeh ha kaba iadei bad ka kam talasi ia kaba lah ban leh bad u drok udei uba suk bha ban buhrieh, lada ngim ioh hi ia ki jingtip kiba thikna yn ym lah ban talasi ia ka kali kaba dei hynrei kan long kaba eh ban talasi lada ym ioh jingtip eiei”.
