U Director ka Tourism, u bah Cyril D Diengdoh, IAS mynta ka sngi ula pyllait paidbah ia ka kot ba la thoh da ka kong Bibika Laloo Tariang ka ‘Mandatory Poison and other Shillong things’ ha Seminar Hall jong ka State Central Library, Shillong. Ka kong Bibika haba kren ha kane ka sngi, ka la ong ba ia kane ka kot la thoh katkum ka jingsngew ka jingshem jong ka kum ka nongshong shnong. Ka la ong ha kane ka kot la thoh shaphang ka kolshor, ka bam ka dih, ki Iew ki hat bad kane ka kot ka long kyrpang na bynta kito kiba la im la sah ha nongbah Shillong bad na bynta ki nongwan jngohkai kiba wan sha Shillong. Ka la ong ba ia kane ka kot ka la pynkhreh hynriew bnai ban thoh da kaba pyndonkam ia ka sap ba la ai na u Blei.
Na ka liang ka kong Bibika ka la ai mynsiem ia kiwei ba ki dei ban sdang ban pyni ia ka sap ba ki don ha ka kam ban thoh kot. U bah Cyril uba long u kongsan ha kane ka sngi, ula ong ba ka jingwan hiar thma ka juk social media ka la pyntroin ia ka jingbang jong ki briew ban pule kot namar ba ki sngew suk ban shu peit ha ki mobile ki Computer. U bah Cyril u la ong ba ka la don ka jingtynjuh ha kane ka juk ban khring ia ki briew ban pule kot namar ba ka social media ka la pynsuk ia ki briew.
Ha kajuh ka por, u la ong ba ka kamram ki nongthoh kot kam dei tang ban pynsngew tynnad ia ki nongpule hynrei ban ai mynsiem ruh ia kiwei ki nongthoh kot. Ula kyntu ia ki briew kiba don sap ban thoh kot, ban mih shakhmat ban pyndonkam ia ka sap ia ka jingriew spah ka ri bad ka jylla.Shwa ia kane, la ioh ruh ia ka jingkren na u bah K. L. Tariang, IAS (Retire) nalor kiwei pat.
