Ka jingwan rung u Dr. Celestine sha ka NPP, kan ym ktah ia ka ticket MDC ka kong Macdalyn Sawkmie Mawlong namar ba ka la dei lypa ka MDC bad ka dei ruh ka rai jong ki nongaialam ka NPP Umsning. Ia kane la pynpaw da ki nongialam ba ha khmat jong ka party NPP Umsning Block. Ha ka jingiakren bad ki nongialam ka NPP Umsning, ki la pynpaw ba jingwan rung u MLA ka Umsning u Dr. Celestine Lyngdoh sha ka NPP, kan nang kham pynkhlain shuh shuh ia ka party khamtam ha ka ilekshon MDC ka ban sa long shen. U General secretary ka NPP Block Umsning, u bah Derrick Nongrang ula ong ba ka NPP Umsning ka pdiang sngewbha ia ka jingwan rung u Dr. Celestine Lyngdoh ha ka party. U bah Derrick ula ong ba watla u Dr Celestine ula don lang ha ka NPP, hynrei haba iadei bad ka tiket MDC ka party ka la rai ba kan tyrwa beit ia ka kyrteng ka kong Macdalyn. “Ka Block NPP Umsning ka la dep rai naduh kham mynshwa ia ka kyrteng kong Macdalyn ban long ka kyrtong, ” ong u bah Derrick.
Ha kajuh ka por ula ong ba ka jingwan iasoh u Dr. Celestine khlem pep kan pynkhlain shuh ia ka kong Macdalyn ha ka MDC ilekshon ka ban sa wan. “Kaba donkam ka long ba kan don ka jingia-sngewthuh jingmut bad ka jingiatreilang kaba don ka jingshaniah,” la pynpaw ki nongialam,” ula ong. Katba na ka liang uwei u nongialam ka NPP Umsning u bah Shanlang Lyngdoh, ula ong ba ka jingwan rung u Dr. Celestine kan pynkhlain shuh ia ka party watla ki sngew kyndit khyndiat namar ba la pdiang beit ha ka seng kmie khlem iasyllok shwa bad ki nongialam ka party jong ka NPP Umsning Block.
Katba ka kong Indari Tariang ka la ong ba kum ka nongialam ka NPP Women Umsning, kan kyrshan tyngeh ia ka kong Macdalyn ha ka MDC ban wan bad ka kyrmen ba ryngkat ka jingiatreilang bad u Dr. Celestine Lyngdoh uba wan rung na ka Congress, kan nang khlain shuh shuh. Ha kajuh ka por u President ka NPP Ri Bhoi District u bah Clement Mawlong ula ong ba kumba ju long ia u nongialam kum ki MLA, MDC ki ju pdiang na ka seng kmie ha Shillong. U la ong ba ka jingwan rung u Dr. Celestine sha ka NPP, kan ym ktah ia ka ticket MDC ka kong Macdalyn namar ba ka la dei lypa ka MDC. U la ong ba ka party kan pyllong ia ka jingpdiang burom ia u Dr. Celestine bad kiwei ki MLA kiba na Ri Bhoi kiba wan rung sha ka NPP ha kine ki sngi ban wan.
