U Myntri Rangbah ka Jylla u Conrad K Sangma ula leit jngoh ia ka dukan ‘Safal’ jong ka Mother Dairy Fruit and Vegetable Pvt. Ltd kaba don ha New Delhi ban peit ia ka jingpyrshang ban kyntiew ia ki mar rep ba pynmih da ka jylla Meghalaya ba la die ha katei ka dukan.Ki sohtrun ba la pynmih na Meghalaya ki bym shim la pyndonkam ia kino kino ki dawai (Organic) ki dei kiba thiang bad kiba bang bha bad haba kine ki soh ki la ih bha, ki da thiang bha bad ka ‘Acid’ ba mih ka duna bha tang 0.6-1.2%.Ia kine ki soh la shalan ha ki iew ba don hapoh ka ri bad shabar jong ka ri India da kaba iaid ban jam lyngba ia ki wah, ki riat ki ram ban poi sha ki iew ki hat ha kylleng jong ka ri India. Nalor kane, la buh kyrpang ia ka IQF ne Individual Quick Freezing hapoh ka Umdihar Cooperative Society, kaba la pyniaid haduh 250 MT u sohtrun ia kabaka don ia ka jingthmu ban pyniaid haduh 600 MT mynta u snem, ia kaba la shim na ki kynhun nongrep ki bapher bapher na Khasi bad Garo Hills.
U Conrad K Sangma ula ong, “Ka Meghalaya ka la pynmih shibun ki sohtrun bad kiwei kiwei ki soh bad ki marbam mardih lyngba ki jong ki, hynrei ka jingeh kaba iakynduh ka dei ka jingdonkam ia ka iew ka hat kaba biang bha kaba lah ban pyniasoh ia ki nongdie bad ki nongthied”. Halor kane ba ka sorkar Meghalaya ka la shim ia kiba bun ki lad ki lynti ha kine ki 3 snem, kynthup ia ka jingpynlong ia ka Pineapple Festival ha Delhi ha u snem ba la dep, ia kaba yn pynlong biang mynta u snem ruh. Nalor kane, ngi la iatreilang ruh bad kiwei kiwei ki kynhun kiba don ia ki dukan ha kylleng ka ri ban pynthikna ba kan don ka jingshalan kaba thikna.“Kumba long mynta ka dukan Safal ka la shu pyrshang ban pyniaid iew ia u sohtrun na Meghalaya kaba tang 250 Kg. Nga la ioh jingtip na u Manish Bandlish, ba ka jinglong jingman bad ka jingiaid iew ka long kaba biang bha bad ngi dap da ka jingkmen ban sdang shuh shuh ban phah ia ki mar rep kiba la pynmih da ki nongrep ka jylla ban poi ha ka ri baroh kawei” ong u Conrad.
U Manish Bandlish, ula ong ba ki Sohtrun na ki jaka lum ka Meghalaya ki la nang pynbun shuh shuh ia ki mar die bad u khmih lynti ban don ka jingiatreilang bad ki nongrep lyngba ka jingkyrshan jong ka sorkar Meghalaya na ka bynta ban ioh shuh shuh ia ki mar naduh ki soh bad kiwei kiwei kiba mih kyrpang.Ka dukan Safal kala pyniaid iew ia u Sohtrun na ka jylla Meghalaya uba la phah lyngba ka Muktidata Multipurpose Cooperative Society ha Tikrikilla, West Garo Hills, kaba dei tang ban shu ai mad ia ki nongthied ha katei ka dukan bad ki nongthied kila ai iaka jingpynsngew kaba bha halor ka jinglong bad jingthiang u Sohtrun ka Meghalaya.
