Ka kali ba kurup pisa kam don bynta ha ka Convoy ba bud ïa u Conrad: SP Longding

U Superintendent of Police (SP) ka Longding u Dekio Gumja ula iathuh ba kila ioh bat ia kawei ka kali Fortuner kaba ïong ha Kanubari Checkpost kaba don ha Longding, Arnuachal Pradesh bad ha ka jingkhynra la ioh kurup ia ka pisa T.1 Klur. “Katei ka kali kaba kit ia katei ka pisa ka dei kaba la shong da u Harshavardhan Singh, uba dei u Executive Director jong ka Badri Rai Company ryngkat bad u nongniah u jong u” ong u SP u Dekio Gumja.

Ula ong, ba kane ka kali kam dei satia kaba don bynta lang ha ka Convoy ne ki kali ai jingiada kiba leit lang bad u Myntri Rangbah ka jylla u Conrad K Sangma jong u National President ka NPP bad hynrei katei ka kali kala leit bud nadien jong katei ka Convoy. “Ngi lah talasi ia ki Convoy ruh hynrei ngim shym la lap eiei hynrei ia ka kali kaba leit bud nadien jong ka Convoy ngi la ioh T.1 Klur bad kumta ngi la kurup noh ia katei ka pisa” ong u Dekio Gumja.

Ula iathuh ba kila dep ban pyntip mardor ia ki ophisar jong ka Income Tax halor katei ka jingioh kurup ia ka pisa bad kin ioh ban leh ia kaba donkam hynrei ha ka jingtohkit kaba mardor u Harshavardhan Singh ula kam ba ula rah ia katei ka pisa na ka bynta ban ia ki nongbylla ki jongu.