U Chief Executive Member ka Khasi Hills Autonomous District Council, u Bah Pyniaid Sing Syiem mynta ka sngi ula iathuh ba ka Council ka sngewshngain ba ka la don ki ain kiba khlain ban iada ia ka jaitbynriew Hynniewtrep bad ban peit ruh ia ka khuid ka suba jong ki shnong ki thaw, ki it ki hima bad Elaka. U Bah Pyniaid ula iathuh ia kane kane, haba pyllait paidbah ia ka kali kit niut na ka skim KHADC na ka bynta ka shnong Nongrah kaba don hapoh Shillong ha ka prokram ba la pyllong da ka Dorbar Shnong Nongrah Pyllun ha madan ialehkai phutbol ka shnong Nongrah, ha kaba la sakhi ruh da ki nongshong shnong. Haba kren ha katei ka sngi, u Bah Pyniaid u la iathuh ia katei ka trok kit niut kaba shongdor kumba T.17 lak ba la ai na ka skhim KHADC lyngba ka 15th. Finance Commission Grant. Ula iathuh ruh ba ka Nongrah kan sa ioh ia ar tylli ki surok rong ba kylluid bad mynta ka jingshna ia ki na la bad kiwei ki jingdonkam ki dang iaid shaid shaid. U CEM u la iathuh ruh ba ka KHADC nalor ba ka ai Sanad ia ki Syiem bad ki Sordar, mynta kan sa ai ruh ia jingithuh ia ki Rangbah Dong, ki Seng Kynthei bad Seng Samla khnang ba kane kan ym buh jingeh ia ki ha kaba iatyngkhuh bad ka ain namar ki trei na bynta ka bha ka miat jong ka shnong ka thaw bad ka imlang sahlang.
U Bah Pynshai u la iathuh ruh ba ki nongshnong hapoh ka KHADC kim donkam shuh ban leit Register ia ka khyndew ka shyiap ka jong ki bad ka Sorkar Jylla bad ki lah ban leh ia kane hapoh ka District Council. Ia kane ka jingialang la pyniaid da u Rangbah Shnong, u Bah D.R. Lynrah. Haba kren ha katei ka sngi, u Secretary jong ka shnong Nongrah, u Bah P. Pyngrope u la pynpaw ia ka jingsngewnguh ia u Chief Executive Member, u Bah Pyniaid Sing Syiem uba la pynioh ia ka kali theh niut bad kiwei ki kam pynroi na ka bynta ka shnong. U Bah Pyngrope ula iathuh ba ka kam nongmihkhmat bad ban kot shaduh ka kyrdan Chief Executive Member (CEM) jong ka KHADC kam long kaba suk bad pynsngew ruh ia ki kyntien phira kiba ong, “Ka
bor ka iktiar ka bud ryngkhih ruh bad ka jingkitkhlieh”. Ha kane ka sngi, ka Executive Committee jong ka Dorbar Shnong Nongrah Pyllun, ka la pynkup burom ruh ia u Rangbahdong Dong Ktieh ba mynshuwa, u Bah A.S. Kharsohnoh bad ia u Bah Sanborn Jungai, uwei na ki nongshong ka Nongrah, kiba la trei shitom ban pynlong ia ka Dorbar Shnong kaba ym shym la lah ban pynlong haduh khatdar snem kynthih. Dei lyngba jong ki ba ka shnong la lah pat ban pynlong ia ka Dorbar Shnong bad ia ka jingjied ia ka Executive Committee bathymmai hapoh ka jingialam jong u Rangbah Shnong u Bah D.R. Lynrah.
