Ka KHADC kan iarap pisa ia ki nongrep ban pyneh ia ki khlaw ki btap

Ka Khasi Hills Autonomous District Council (KHADC) ha ryngkat ka jingïatreilang bad ka tnat Meghalaya Basin Development Agency (MBDA) ka sorkar Jylla hynne ka sngi ka la lum ka jingialang ban iakren halor ka prokram ‘Green Economy Meghalaya’. Ka jingthmu jong ka ‘Green Economy Meghalaya’ ka dei na ka bynta ban shim ia ki lad ban pynneh pynsah ïa ki khlaw ki btap ban ïoh ïa ka lyer kaba khuid ba suba bad ban ai jingmyntoi na ka bynta ki nongrep kiba lah ban ïada ïa ka mariang.Haba kren sha ki lad pathai khubor hadien ka jingialang, u CEM ka KHADC u Bah Pynïaid Sing Syiem ula ong ba ïa kane ka prokram ‘Green Economy Meghalaya’ yn pyntreikam ha ka jingiatreilang bad ka Rabo Bank Acorn bad ka Iora Ecological Pvt Ltd kiba na ka nongbah Delhi.

U Bah Pynïaid ula ong ba jingïalang ka dei ban ia kren halor ka Projek ‘Green Economy Meghalaya’ kaba long ka jingthmu ban pynneh pynsah ïa ki khlaw ki btap da kaba kan ai jingïarap shi ki nongrep kiba thung dieng, kynthup ïa ki dieng latyrpat, ki dieng sohmarit, ki dieng kwai.“Ka Council kan ai ruh ïa ka jingïarap sha ki khlaw kyntang, ki khlaw ka Hima, ki khlaw kur, halor kane ngi la dep ban pynlong ïa ka jingïalang bad mynta ka sngi ngi la khot jingïalang bad ka JHADC bad GHADC, kaba ki khlem wan, hynrei la wan shim bynta da ki nongïalam Hima” la ong u Bah Pyniaid.

U Bah Pyniaid ula iathuh ba kala don ki ain jong ka Sorkar Pdeng bad Sorkar Jylla ban ïada ïa ki khlaw ki btap bad ka Sorkar Jylla lyngba ka ‘Green Economy Meghalaya’ kan ïarap ïa ki nongrep kiba ïarap ban pynneh pynsah ïa ki khlaw da kaba ai da ka jingïarap pisa hapoh kane ka projek.” Ula iathuh ba haduh mynta la don haduh 28 ngut ki nongrep kiba la dep ban Register ia lade bad ka KHADC ka bynta kane ka projek bad ula kyntu ruh ia ki kiwei ki nongrep ban bud nuksa bad ba kin wan shakhmat ban shim ïa ka sienjam ban sumar sukher ïa ki khlaw ki btap.