U MLA ka Mawsynram u Bah Ollan Sing Suin ula ong, ba ka krem Mawjymbuin ka dei ka jaka jngohkai pyrthei bad kam dei ban long ka jaka mane blei. U bah Suin haba kren sha ki lad pathai khubor ula ong ba lada pynlong ia ka krem Mawjymbuin kum ka jaka mane blei, kan nym pynsngew tynnad ia kiwei ki paidbah. Lah ban kdew ba ka la don ka jingthmu ban pyllong ia ka jingiaid yatra sha katei ka jaka ha ka 10 bad 11 tarik mynta u bnai hynrei ka dorbar shnong Mawsynram ka la pyrshah ia kane ban pyllong ia katei ka krem kum ka jaka mane blei da kaba iaid yatra na Shillong sha katei ka jaka.
Na ka liang u MLA ka Mawsynram ula pynpaw ruh ia ka jingsngew iahap halor ka jingpyrshah ka Dorbar shnong Mawsynram ban pyllong ia kane ka krem kum ka jaka mane blei. U bah Suin u la ong ba ka la don ka jingwan iaid yatra ha ki khyndiat snem bad ka dorbar shnong Mawsynram ka la iohi ia ka jingjaboh kaba la isih ia ka sawdong sawkun ha katei ka jaka.
“Ka krem Mawjymbuin ka dei ka jaka jngohkai bad kam dei ban pyllong ka jaka mane blei. Lada pyllong ia ka kum ka jaka mane ia kano kano ka jait niam, kan ym pyllong ia kiwei pat ban sngew tynnad”, la ong u bah Suin. U la ong ba shisien ba ka Dorbar shnong kam shah, ka jingai jingbit ka bor synshar na ka district ruh, kan ym treikam namar ba ha ka jingai jingbit kaba mynshwa, ka bor district ka la buh kyndon ba ki dei ban ioh jingbit na ka shnong.
