U Nongiasaid aiñ ka Dorbar Shnong Mawsynram u Bah VGK Kynta hynne ka sngi ula pyntip ba ka iingkashari Meghalaya High Court ka la bynshet ha ka Dorbar Shnong ba kan shim ia ka rai hadien ba ka la dep ban iasyllok bad kiba bun balang. “Ka la don ka jingpyrshah jur na ka liang ka Dorbar Shnong, namar ba khlem ai NOC, ha ki por mynshwa ki la don ki jingpynkheiñ bad jingbym kohnguh ia ki kyndon. U nongbishar mynta ula kren bad pynsngewthuh bha ia ki dkhot jong ka Dorbar Shnong, Rangbah Shnong, Assistant Rangbah Shnong bad u Secretary baroh ba donlang. Ka mat ka long ba kim kwah ba kane ka jingjia kan long madan thma namar lah iohi ha kylleng ka la don ka jinghuri hura na ka daw jong ka niam bad ka jaidbynriew” ong u Bah Kynta ha ki nongthoh khubor hadien ka jingbishar ia ka mukotduma.
U Bah Kynta ula ong, “U Nongbishar u kwah ba kan don ka jingiapynbeit da kaba suk bad ka phang ka long, ba ula bret sha ka Dorbar Shnong ban bishar bha ia kane ka kam namar hap ban pyrkhat ba ka dei ka jaka jngohkai kaba khring ia ki paidbah”. “Ngim lah ban kren eiei halor ka jingiatai hapoh ka iingkashari namar ka dang don hapdeng ka jingtian bishar hynrei ka dorbar kan sa shong bishar ia kane ka kam hadien ba ka la dep kynjoh ktien na ki dkhot jong ka shnong bad kiwei kiwei kiba don bynta lang ha ka kam kum ki kynhun Sengbhalang, ka Seng Khasi” la ong u nongiasaid aiñ.
Ula ong, ba u kwah ia ka shongsuk shongsaiñ bad ba ka shnong bad ka Hima ka dei ban ioh jingmyntoi na ka jingwan jong ki nongjngohkai.U la iathuh ka iingbishar ka la buh ha ka 14 tarik mynta u bnai ban bishar bad ha katei ka por, ki nongialam dorbar shnong ki hap ban wanrah ia ka rai kaba ki la shim kum ka dorbar shnong. Ka Meghalaya High Court ka la bishar ia ka mukotduma ba la mudui da ka Yatra halor ka jingbym ai NOC ban pynlong ia ka jingiaid pilkrim sha Krem Mawjymbuiñ ha Mawsynram.
