Ka seng samla Hills State People Democratic Party lyngba u General Secretary u samla Pynshai Joel Dkhar haka jingialang leh burom ia ka lyngkhuh sngi iap ba 9 jong u bah Hopingstone Lyngdoh Nonglait ha Mawphanlur ka la pynpaw ia ka jingangnud ban tei ia u motdur jong u bah Hopingstone ha Langpih namar ka Langpih ka dei u klong snam jong u bah Hopingstone Lyngdoh Nonglait u nongseng ka seng HSPDP.
U samla pynshai Joel Dkhar ula ong ba ka Youth Wing ka angnud ban pyndep ban tei ia une u motdur ha shwa ka Lyngkhuh sngi iap ba 10 jong u bah Hopingstone ia kaba yn sa rakhe ha u snem 2025. U la iathuh ruh ba ha kane ka sngi ha Langpih ruh la kynmaw burom ia ka lyngkhuh sngi iap ba khyndai jong u bah Hopingstone Lyngdoh.
Shuh shuh u samla Pynshai Joel Dkhar ula iathuh ba ka jingtei ia u Motdur jong u bah Hopingstone Lyngdoh Nonglait ha Mawphanlur, kaba dei ka jaka jngohkai kaba pawnam ha Meghalaya ka dei ba ki briew kiba wan kai sha kane ka jaka na kylleng ka ri bad nabar jong ka ri ruh kin ioh tip shaphang jong u bah Hopingstone bad iaki kam radbah jong u.
Ha kane ka sngi leh burom ia ka lyngkhuh sngi iap ba 9 jong u bah Hopingstone Lyngdoh Nonglait ha Mawphanlur, ka shnong kaba hap ha Rambrai Jyrngam Constituency la synranlang ia ka Youth Wing da u President rangbah ka seng HSPDP u bah KP Pangniang, u MLA ka Mawshynrut u bah Methodius Dkhar nalor kiwei kiwei ki nongialam kiba hakhmat jong ka seng HSPDP.
