Ka Meghalaya ka la pynkhreh ia ka ilekshon MP Lok Sabha, CEO

U Chief Electoral Officer (CEO) ka Meghalaya u BDR Tiwari ula ong, ba ka jylla Meghalaya kala long kaba la pynkhreh na ka bynta ban pynlong ia ka Elekshon MP Lok Sabha mynta u snem ha ka jylla.
U BDR Tiwari ula iathuh ba hynin ka sngi, ula lum ia ka jingialang bad ki Deputy Commissioner (DC) bad ki Superintendent of Police (SP) jong ki District bapher jong ka jylla ha kaba iadei bad ka jingpynkhreh ia ka Elekshon MP Lok Sabha bad ha kane ka jingialang la leh ruh ia ka Video Conferencing bad ki heh jongka Election Commission of India (ECI) ban ai ia ki jingtip ha kaba iadei bad ka jingpynkhreh jong ka jylla ia ka elekshon.
Ula iathuh ba ki DC bad ki SP kila pynpaw ha ki heh jong ka ECI halor ka jingpynkhreh bad halor ka jinglong jingman jong ka jylla bad ula ong, ba katei ka jingpynpaw ka jongki ka long kaba biang bha bad ka jylla Meghalaya kala long kaba la pynkhreh ban pynlong ia ka Elekshon MP Lok Sabha.
U CEO ula ong, ki kam ki jam kila iaid bha shakhmat bad kumta la khmih lynti ba ka jingpynlong ia ka elekshon kan long kaba iaid beit iaid ryntih bad ki paidbah kin mih ryntih bun ban iashimbynta ha ka elekshon bad mynta ka tnad Elekshon jong ka jylla ka ap sa tang ia ka jingpynbna jong ka ECI ban pynlong iaka elekshon MP ha Meghalaya
Kumban shu kdew ka Elekshon MP Lok Sabha haka jylla Meghalaya kan long ha ki Ar tylli ki Constituency, kata ha Shillong Parliamentary Constituency bad Tura Parliamentary Constituency.