Ka MRSS (Amendment Bill) Ka Ïatakhuh Bad Ki Aiñ Jong Ka Parliament: Prestone

U Symbud Myntri Rangbah ka Jylla u Bah Prestone Tynsong u la pynpaw ba ka Sorkar kan sa khot noh shen ïa ka jingïalang jong ki kynhun bapher bapher ban ïathir ïatai bad ban ïathew ïawoh halor ka jingpynphai jong ka Ministry of Home Affairs ka Sorkar Pdeng ïa ka Meghalaya Residetns Safety and Security (Amendment Bill) 2020 bad phah ruh katto katne ki jingkynthoh.
Ha ka jingïakren bad ki lad pathai khubor ha ka sngi Balang, u Symbud Myntri Rangbah u la ïathuh ba ka Ministry of Home Affairs (MHA) Sorkar Pdeng ka la pynpaw ba ka Meghalaya Residents Safety and Security (Amendment Bill), 2020 ka ïatakhuh bad ki aiñ ba la mynjur da ka Parliament namarba ka jingthmu jong kane ka Bill ka long ban pynieng ïa ki khyrdop talasi mynder ne ki Facilitation Centre.
U la ïathuh ba u Myntri Rangbah un sa khot noh shen ïa ka jingïalang bad ki kynhun bapher bapher na ka bynta pan ïa ki jingai jingmut bad ki jingsngew na baroh ki kynhun halor kane jingkynthoh bad ka jingpynphai biang jong ka Ministry ïa ka MRSS (Amendment) Bill, 2020.
“Ka MHA ka ong ba ki Amendment Bill ka ïatakhuh bad ki aiñ ba la mynjur da ka Parliament namarba ngi thmu ban buh ïa ki Facilitation Centre ne ki Khyrdop talasi. Ki (MHA) pynpaw ba kane ka ktah namarba ka Meghalaya ka dei ka khyrdop rung bad mih, bad phim lah ban pynwit ïa ka leit ka wan jong ki paidbah na ka them Barak Valley lane kiba wan na Guwahati ban leit sha Mizoram,” u la ong.
Haba kylli, u la ong, “ka ILP ka dei kawei pat ka ishu. Ka MRSSA ka dei kawei pat ka ishu. Ngi la ïai ban ba ngi dei ban ïoh ïa ka ILP bad ka ILP ka dei ka aiñ jong ka Sorkar Pdeng. Kane ka aiñ ha ka por ba ki mynjur ïa ka, ki la don lypa ki kyndon, kaba ong ba phi donkam ban leh ïa kane khamtam ka Meghalaya ka dei ka khyrdop. Phi hap ban leh ïa kane bad ban pynthikna ba ka leit ka wan jong ki kali bad ki paidbah kam dei ban shah pynwit. Kata ka dei ka ILP.”
“Hynrei kaei kaba ngi leh ïa ka MRSSA, balei ki pyni, ki ong ba kane ka ishu ka ïatakhuh namarba kum ki nongshong shnong jong ka ri India ki lah ban ïaid laitluid na kawei ka jylla sha kawei pat bad kam don kano kano ka aiñ kaba lah ban khanglad ïa ki ban ïaid na kawei ka jylla sha kawei pat. Kane ka ladei kawei pat ka ishu,” la ong u Symbud Myntri Rangbah.
U la ong ruh, lada ka Sorkar ka mynjur ïa ka ILP, kin don ki kyndon kiba pynthikna ba kam dei ban don kano kano ka jingpynwit ïa ki paidbah kiba ïaid lynti na kane ka jylla.
“Ka Sorkar Jylla ka la buddien ïa kane ka kam na ka Sorkar Pdeng halor ka ILP. U Myntri Rangbah u la ïalam ïa ka kynhun Myntri bad ngi la ïakynduh ïa u Myntri Rangbahduh ka ri bad ngi ladep ïakren ym tang halor ka ILP hynrei wat ha kaba ïadei bad ka jingpynrung ïa ka Ktien Khasi bad Garo,” la ïathuh u Bah Tynsong.