U Vice President ka Ri India u Jagdeep Dhankhar ha ka sien banyngkong ba wan iuhkjat hapoh ka Jylla hynne ka sngi u la buh nongrim ia ka Meghalaya Skill and Innovation Hub (MSIB) ha ka jingialang ba la pynlong ha State Convention Centre Shillong. Ha kane ka sngi la donlang u Lat ka jylla u CH Vijayashankar, u Myntri Rangbah ka jylla u Conrad K Sangma, ka Myntri ka tnat koit ka khiah ka Kong Ampareen Lyngdoh, u Myntri ka tnat Animal Husbandary u Bah AL Hek, u CS ka Jylla u Bah DP Wahlang lem bad kiwei ki heh Sorkar nalor ki samla pule. Nalor kane u Vice President u la plie paidbah ruh ïa ka CM Business Catalyst: Student B-Plan Challenge bad ka IIM Shillong bad ula sakhi ruh ia ka jingïasoi ïa ka MoU hapdeng ka UNDP bad ka Sorkar Meghalaya ban kyntiew ïa ka kam seng kam seng jam. Ia ka Meghalaya Skill and Innovation Hub (MSIB) yn shna ha ka jaka kaba heh kumba 6.54 akar ha New Shillong ha ka jinglut ba T.77.5 Klur bad kane ka MSIB ka dei ka jaka ban pynbiang ia ka jingdonkam jong ki samla na ka bynta ka ioh jingjhikai, ban sengkam lajong bad ban iatreilang bad karkhana ne Industry.
Haba kren ha kane ka sngi, u Vice President ka Ri India, u Jagdeep Dhankhar ula ai ka jingiaroh ia u Myntri Rangbah ka Jylla u Conrad K Sangma na ka bynta ka jingiarap bapher bapher ka ban pynroi ia ka sap jong ki samla nongshong shnong ka Meghalaya. U Jagdeep Dhankhar ula ong ba ia ka kam ba ha khlieh duh jong ka Ri ka President, la bat da ka kynthei, kaba dei ka riewlum bad ka heh Pulit lane DGP jong ka Meghalaya ruh la bat hi da ka kynthei kaba dei ka riewlum bad kane ka pyni ia ka jingkylla jong ka roi ka par jong ka Ri. U la ong ba ka MSIB kan iaid lynti jngai ha kaba kyntiew ia ka kam seng kam seng jam ha ka Jylla bad ula kular ruh ba ka tnat Human Resources jong ka Meghalaya kan ioh ka jingkyrshan da ka jingdon ia kane ka Centre.“Ka jingtbit jong ki samla ka dei ka jingdonkam jong ka por” la ong u Vice President. U Vice President ula ong ba u Myntri Rangbahduh ka Ri u Narendra Modi u la plie ia ka jingkhang jong ki lad ki lynti na ka bynta ki samla lyngba ki jingai jinghikai pyntbit (Killing) bad ki jingsengkam (Start-up) prokram bapher bapher hapoh ka Ri. U la pyntip ruh ba la mang T60,000 klur na ka bynta ban pyntbit ia ki 5 lak ngut ki samla ha ki san snem ban wan ha ka ri. “Ka jingpynkup bor ïa ki samla kan pynthikna ïa ka jingkiew ba khraw ha ka ïoh ka kot ha ka Ri,” ula bynrap. Haba kren ha kane ka sngi, u Lat ka Jylla u CH Vijayashankar ula pynpaw ia ka jingkhlain bad ka jingriewspah jong ka Jylla ban ai lad ia ki samla ban ieng ha la ki jong ki kjat lyngba ki jingseng kam bapher bapher.
Haba kren ha kane ka sngi, u Myntri Rangbah ka Jylla u Conrad K Sangma ula ong, ba ka jingdon ki samla jong ka Meghalaya ka dei ka bor jong ka. U Conrad ula ong ba ka Sorkar ka kyrshan ia ka kam seng kam seng jam ha ka rukom kaba heh bad ka jingthaw da ka MSIB bad kiwei ki jaka ai jinghikai pyntbit ka dei ban weng ia ka jingduna briew ha ka sengkam sengjam. “85 percent na ki nongshong shnong jong ngi ki don hapoh ka rta kaba 45. Ki samla ki dei ka bor bad ka jingdon jingem kaba khraw tam jong ngi bad ngi la sdang ïa ki prokram ban ai jinghikai pyntbit khnang ba ki samla kin long ka bor khamtam ha ka sengkam sengjam lajong” la ong u Conrad. Ula bynrap ba ka Sorkar ka don ki prokram bapher bapher ban ai jinghikai ia ki samla, khnang ba kin lah ban noh synniang kaba pynmih na ka bynta ka jingroi jong ka Jylla. Haba kren halor ka jingkyntiew ia ki nongseng kam, u Myntri Rangbah ula ong ba ka Sorkar ka pynlong ia ki jingiakop business plan bapher bapher bad ka kyrshan ia ki nongseng kam. “Ngi ai jingkyrshan bad ban btin kti ïa ki nongseng kam seng jam jong ngi lyngba ki prokram kum ka CM Elevate da ka ba ai jinghikai pyntbit bad ban ai jingïarap pisa” u la ong.
