Ka NEEPCO Workers Union, NEEPCO Employees Union bad ka Federation NEEPCO Employees Union ki la pynlong ia ka jingialang ha ka sngi Saitjaiñ ha kaba ki nongtrei ka NEEPCO na kylleng ki bynta ka thaiñ shatei lammihngi ki la wan ia shim bynta.Kine 3 tylli ki Union ki la pyniasohlang noh ha kawei ka kynhun ba la ai kyrteng da ka Registered Trade Union of NEEPCO (RTUN) ia kaba mynshwa la tip kum ka NEEPCO Workers Union. U Subhash Kumar Roy, Dy. Chief Labour Commissioner (Retd.) ula wan ban donlang ha ka jingialang jingpyniasoh lang ia kitei ki seng kum u nongpeit pyrman. Ha ka jingialang ba la long ha ka por janmiet la wan ban iadonlang u Myntri ka sorkar jylla u Bah AL Hek, ka Editor jong ka kotkhubor Shillong Times ka Kong Patricia Mukhim, ki heh ophisar ka NEEPCO bad kiwei.
U Bah A.L. Hek haba kren ha ka jingialang ula ong, ka thaiñ shatei lamihngi ka don bun ki lad ban pynmih bording lyngba ki wah bad ka NEEPCO ka don ia ka bynta ba khraw halor ka kam pynmih bording elektrik. U la ong, ba u kloi ban iarap ia ka NEEPCO lada ka mad ia kino kino ki jingeh ban iakren bad ka Sorkar Meghalaya ne bad ka Ministry of Power ka Sorkar India. U Bah Hek ula pynpaw ia ka jingdonkam ban pynmih bording ba khuid kaba lah ban pynneh ia ka kam khaii da kaba pynheh ia ka projek pynmih bording ha ka thain shatei lam mihngi hapoh ka jingialam jong u Myntri Rangbahduh ka ri u Narendra Modi.
Katba ka Kong Patricia Mukhim ka la ong, ba ka jingdon katei ka jingialang ka dei kum ka nongthoh khubor bad kaba baar ka dei ruh kum ka nongtrei bad kumta ka sngewthuh bha ia ka jingeh ki nongtrei bad ki nongtrei ki dei ban sngewtrai ia ka kam bad ia ka kompani na ka bynta ban pynneh pynsah bad ban pyniar shuh shuh ia ka. Ka la ong, ba ki tyllong um bad ki wah ki la jakhlia lut na ka bynta ban ioh pynmih ia ka bording elektrik bad ka la kyntu ïa ki bor pynïaid ka NEEPCO ba ki dei ban mih shakhmat da ka leh ia ki kam lyngba ka CSR scheme na ka bynta ban pynkhuid ïa ki wah ha kylleng ka jylla. Ka la kyntu ruh ia ki nongtrei ba kin iada ia ki um ki wah kiba long ka tyllong ha ban pynmih ia ka bording bad ban ai jingim.
