Ka Resubelpara District kan long kawei na ki District ha jylla ban kiew stet ha ka ioh ka kot bad khaii pateng na ka jingdon ka lynti rel bad ka jingpyntrei ka sorkar ia ki skhim bapher bapher bad ka jingseisoh ka khyndew ban rep ban riang kum u kba, kait, ki soh bad kiwei kiwei. Ka kynhun ki nongthoh khubor hapoh ka jingialam ka ophis jong u Director Information and public Relation (DIPR) Shillong ka la leit jurip dang shen ia katto katne ki skhim ba ka sorkar ka la pyntrei lyngba ka tnat Horticulture ban kyntiew ia ki nongrep hapoh ka district. Lah ban ong ka jingpyntrei ka sorkar ia ka skhim MISSION ORGANIC VALUE CHAIN DEVELOPMENT FOR NORTH EASTERN REGION (MOVCDNER) kan long ka jingmyntoi ban kyrshan ia ki nongrep naduh ka por thung, ban pynkhuid, ban pynlum pynlang bad haduh ban pynpoi ha ki iew bad kumno ba kin lah ban pynmih bun ki mar rep bad ki nongthied ban ym duhnong ki nongrep. Ka la sorkar ka la pyntrei bun ki skhim ha North Garo Hills bad kumjuh ki jaka shna sain ia ki mar rep kum ka kait ban shna ship, ka lung ban shna ashar bad kiwei ki jaid soh ne jame bad song bha die sha jylla bad shabar jylla.
Ka kynhun ki nongthoh khubor ka la jurip ia ka jaka ai jinghikai ban ri ngap ne ka Integrated Bee Development Centre (IBDC) ha Sambrak kaba long kawei na ki centre ha ka thain lammihngi ba la bei pisa da ka Ministry of tribal affairs (MOTA) haduh T.10 klur bad la plie da u Myntri Rangduh ka ri u Narendra Modi ka 18 tarik Nohprah, 2022. Ka jingthmu jong ka projek ka long ban iarap pynroi ha ka kam jingri ngap bad kumno ban sain um ngap ba ki nongrep ki lah ban ioh kamai kham bha ryngkat ka jingtip na bynta kawei. Ki don palat 300 ngut kiba shah hikai pyntbit ban ri ngap na kylleng ka jylla mynta u snem. La lap rung ba North Garo Hills ka dei kawei na ki district kaba pynmih bun ka kait lyngba ka jingiarap ka sorkar ia ki nongrep bad la iathuh ki don palat 2000 ngut ki nongrep ba la ioh jingiarap ban rep kait.
Uwei u nongrep ba la ithuh kyrteng u Utul Rabha ula rep haduh 3000 ki kait ha Jonglapara, Resubelpara ha u snem 2023-24 bad u la ioh kamai kumba T.4,50,000/- na kaba die kait. Ka Officer jong ka tnad Horticulture ka Hansanora Sangma ka la ithuh ba ka kait Chinichampa ka dei ba iaid iew bha bad ka jingdawa ka jur bha sha jylla Bihar, West Bengal bad kiwei ki jylla. Ka kynhun ka jurip rip ka jaka rep soh dragon, Vanilla bad kiwei.Ki nongrep ha ka jingkynduh bad ki nongthoh khubor ki la pynpaw ka jingkmen halor ka jingiarap ka sorkar kumno ban kyntiew ia ka kam rep kin kham ioh kamai bad ki kyrmen ka sorkar kan dang iaid bteng ban iarap ha bun ki liang ban kyntiew ia ka ioh ka kot ia ki paidbah ha ka district.
