Ka NPP bad BJP kim dei ki juh hynrei ki iatreilang ha ka sorkar: Shangpliang

U Nongaiktien ka National People’s Party (NPP) u Bah Himalaya M Shangpliang ula ong ba ka NPP bad ka BJP kim dei satia ki juh hynrei ki dei kiba shu ia treilang ha kaban thaw ia ka sorkar jylla bad ia ka sorkar pdeng.
U Bah HM Shangpliang ha ba iakren bad ki nongthoh khubor hynne ka sngi, ula ong ba ka seng NPP bad ka BJP kim dei satia kijuh kumba la shah kynnoh ha ki liang pyrshah bad kam long satia kano kano kaba thymmai ba ka BJP bad ka NPP ki iatreilang ha ka sorkar National Democratic Alliance (NDA) bad ha ka sorkar Meghalaya Democratic Alliance (MDA).

“Haba la thaw ia ka kynhun NDA, ka NPP kala dei kaba la dep ban don lypa ha katei ka kynhun bad ka BJP ha ka jingthaw ia ka Sorkar Pdeng bad phi lah ruh ban sakhi ia katei ka juh ka jingiatreilang ha ka Sorkar MDA-1 bad ngi la ioh ia ka jingkyrshan bad jingiatreilang na ka seng BJP, UDP bad kiwei kiwei ha kaban thaw ia ka sorkar bad kumjuh wat mynta ha ka sorkar MDA-2 ruh, ka BJP kadei kaba donlang ha ka sorkar jylla” ong u Bah Shangpliang.

U Nongaiktien ka NPP ula ong, ba ka NPP ka sngewburom ia ka jingrai ka BJP ban ai jingkyrshan ia ka NPP ha ka elekshon MP Lok Sabha hapoh ka jylla Meghalaya ban plie lad ia ka Kong Ampareen Lyngdoh ban jop suk ia ka elekshon.

“watla ka NPP ka iatreilang bad ka BJP, hynrei ka NPP kala rah ia ki mat kiba iadei bad ka CAA, ILP bad kam long kaba iahap ban ong ba ka BJP bad ka NPP kidei kijuh. Ka NPP ka ieng na ka bynta ki paidbah ka jylla bad ki don ki ishu kiba iadei bad ki paidbah ka jylla kaba ka NPP ka ieng. Ngi iakhun na ka bynta ban pynioh ia ka jingiathuh ia ka ktien Khasi bad Garo hapoh jongka Eighth Schedule bad ngin iai bteng halor kane ka kam” ong u Bah Shangpliang.

Ula ong, ba ka NPP ka dang iai buddien halor ka Resolution kaba la mynjur da ka iing dorbar thawain ka jylla ha kaba iadei bad ka ILP bad kadei lyngba ka jingstad jong ki nongialam ka NPP ba ia ka CAA ym shim la pyntreikam pura ha ka jylla Meghalaya.
“Ngi burom ia ka jingiatreilang bad ka BJP bad ngi ia burom mar kylliang bad ngi khmih lynti ba ngin ia iaid lang bad kane ka kynhun iatreilang ha kine ki sngi ban wanrah ia ki kam pynroi bad ia ka bha ka miat haka jylla” la ong u Bah Shangpliang.