Ka Parliament kan shim ka rai ba kham phylla ha ka iing Dorbar Thymmai: Modi

Ka dorbar mang tyngka ka sorkar pdeng ka la sdang hynne ka sngi Balang, u Myntri Rangbahduh ka Ri, u Narendra Modi ula kyntu ia ki dkhot ka iing ban ym pynthud ia rukom pyniaid ha baroh ar ki iing Dorbar,  ula ong kito kiba wan da ka jingmut ban wanrah jingkulmar ki dei ban pyrkhat bha ia lade ki la leh aiu kine ki 10 snem ba la dep.”Ym don uwei ban kynmaw  ia kito kiba wanrah jingkulmar ha ka iing… kam lei lei ia ka jingkren kaba ktah ia kiwei namar ym don uwei ruh ban kynmaw. Hynrei ki paidbah ki kynmaw ia kito kiba ai jingmut ba bha na bynta jingmyntoi ka iing”, ong u Myntri Rangbahduh ha ki nongthoh khubor.U Myntri Rangbahduh ula ong, ka BJP kan wanrah ia ka mang tyngka ba pura hadien ba la thaw ia ka sorkar thymmai.

 “Phi tip haba ka ilekshon ka la jan, borabor ia ka mang tyngka ba pura yn sa wanrah hadien katkum ka dustur, ngin sa wanrah ia ka mang tyngka ba pura hadien ba la thaw ia ka sorkar thymmai”, ula bynrap. U Myntri Rangbahduh ula ong, ha kaba kut ka sien shong dorbar banyngkong ha ka iing Dorbar thymmai, ka Parliament kan shim ia ka rai kaba kham phylla bad kata ka rai ka long ia ka ‘Narishakti Vandan Act’  kaba la wanrah ha ka iing dorbar Lok Sabha ha ka 19 tarik Nailur, 2023 ha ka dorbar kyrpang jong ka Parliament.”Ha ka 26 tarik Kyllalyngot, ngi iohi kumno ka jingkhraw ka Ri, ia ka jinglah ban kiew shaphrang wat hapdeng bunki jingeh bad ka jingpynkup ia ki kynthei, ula ong. Ia ka mang tyngka bynrap la wanrah da ka jingai jingmut ka President ka Droupadi Murmu bad lashai yn wanrah da ka Nirmala Sitharaman  kum shibynta ka jingrakhe ban kynmaw burom ia ka jingpynkup bor ia ki kynthei”, ula ong.

Ka dorbar mang tyngka ka Parliament ka la sdang hynne ka sngi da ka jingkren ka President ka Droupadi Murmu ha baroh ar tylli ki iingdorbar Parliament.Ka Myntri pla tyngka ka Nirmala Sitharaman kan wanrah ia ka mang tyngka lashai ka sngi Palei bad ka dorbar kan bteng haduh 9 tarik Rymphang. Ha kajuh ka por, ka sorkar hynne ka sngi ka la pynlong ka jingialang jong baroh ki seng sain hima na bynta ka jingiaid beit ha baroh ar tylli ki Iing dorbar.