Kum shibynta ban ioh ki jingai jingmut halor ka State Education Commission (SEC) ka jylla, ka la lum ia ka jingialang hynnin ka sngi ha Loyola College, Williamnagar ban sngap ia ka jingpynsngew ki khlieh jong ki jaka pule ha East Garo Hills District bad kumjuh ban iathir ia ki mat ba donkam. Ia ka jingialang la pyniaid da ka Chairperson ka SEC ka Prof SM Sungoh bad ka donlang u Member Secretary bad u Secretary ka pule puthi ka jylla u Ambrose Ch Marak, ki nongaibuit kynthup ia u Dr. David Syiemlieh bad u Tony Travert Ch Marak, u Deputy Commissioner ka East Garo Hills, u Vibhor Aggarwal bad ki khlieh jong ki jaka pule.
Ka Prof SM Sungoh, ka la pynshai halor ka jingthmu bad ia ka nongrim jong ka State Education Commission (SEC) bad ka la pynpaw ba ka pule puthi ha ka jylla ka dang iaid hapdeng ka lynti jong ka jingkylla lyngba ka jingsdang pyntreikam ia ka National Education Policy, 2020.Ka la pyntip ruh ba ka SEC ka la shah pynkup bor ban khmih ia ki jingeh ba la mad da ka Human Resources Development bad ka sorkar Meghalaya. Katba u Deputy Commissioner ula ong, ba ka jingai jingmut ki khlieh jong ki jaka pule ha ka district kan iarap ban pynbha ia ka pule puthi ha ka jylla bad ula pynpaw ba ki skul Lower Primary bad Upper Primary ha ka district ki kynduh jingeh.
Ki khlieh jong ki jaka pule shim bynta ban iatai bad ia phylliew jingmut bad ka SEC kynthup ia u Deputy Commissioner, u Sub-Divisional School Education Officer (SDSEO), Samuel K Sangma, Principal ka Holy Family School, Rongjeng, Loyola College, Williamnagar Govt. College, Rongrenggre Govt. Higher Secondary School, Greenyard Higher Secondary, Sacred Heart Higher Secondary School bad Educere Higher Secondary School, baroh na Williamnagar bad ka St. George Higher Secondary School, Samanda.
