U Lahkmen Rymbui MLA ka Amlarem Constituency uba dei ruh u nongaibuit ka sorkar Jylla, hynne ka sngi haba kren kum u kongsan haka jingialang plie pyrda iaka jinglehkmen dap 50 snem ka Nongtalang Govt Secondary School Nongtalang u ong, ka pule puthi haka juk ba mynta kam dei shuh tang ban shu sngap iaka jinghikai ki nonghikai bad ialeh ban kynmaw lyndet ia kata haka por thoh exam khnang ban ioh heh ki mark, hynrei haka juk mynta dei ban nang ruh ban pyrkhat ban puson iaka jinghikai ba ioh lyngba ka pule puthi bad jingshisha jong ka jingim. Ka jingkylla ba kum kane u ong ka long donkam bha haki khynnah skul kumba ki donkam iaka juk jingstad saian bapher bapher, bad kum ki khynnah skul ruh kila sngewthuh ba haduh katno ka juk stad saian kala iarap iaka jingim ba man ka sngi jong ki. U Lahkmen Rymbui u ong ruh ba kum ki skul ki dei bad ailad iaki khynnah skul ba kin sngewthuh iaki jingshisha ki jingeh ka jingim bad ruh iaki jingjia ba shisha. Bad halor kane ki nonghikai ki don iaka bynta ba kongsan, ba wym tang ban hikai hapoh kamra klas hynrei ban pyni ruh iaka jingshisha jong ka jingim.
Kumta u kyntu iaki nonghikai ka Nongtalang Govt Secondary School ba kin sdang daka learning club naka bynta ki khynnah skul, khnang ba kin iohlad iamir jingmut kylliang para maki naka bynta ban iathir ia kano kano ka mat, bad kaba kongsan tam ban wanrah iaki mat symboh jingpyrkhat para khynnah skul. U kyntu ruh iaki nonghikai ka Nongtalang Govt Secondary School ban ialam ia kiba pule class 9 bad 10 kum shaka Kad Khaïï Khappud (Land Port) ba don ha Dawki, khang ba kin sngewthuh iaka rukom ia khaïi pateiñ lyngba katei ka Land Port. Bad da kaba leh kumta lehse ynsa don napdeng ki khynnah skul ki ban sa long ki business baheh baheh.Ka juk pule puthi ba mynta ka long donkam bha ban pynkupbor ialade namar ba kane ka dei ka tynrai jongka pule puthi ha kine ki sngi, bad halor kane u ong ba ka sorkar ruh kala wanrah iaka new education policy.
Na ka liang ka A.P.Syiem District School Education Officer, West Jaiñtia Hills District kum ka symbud kongsan ka ong, kane ka sngi ka pynkynmaw iaki jingiaid lynti ba shadien bad kumno yn lah pynbha shuh shuh shakhmat. Ka khmih lynti lyngba kane ka jingrakhe kan nangai mynsiem shuh shuh iaki nonghikai, ki khynnah skul bad baroh kiba don bynta ba kin nangtrei shitom shuh shuh ban kyntiew iaka pule puthi. Ha kane ka jinglehkmen la ioh ruh ka jingkren na u MDC ka thaiñ u Holando Lamin, ka jingiathuh khana lyngkot halor ka jingiaid lynti kane ka skul na u Asst Headmaster u Albert Lyngdoh, ka jingkren na u waheh shnong Nongtalang u Min Lyngdoh bad kiwei. Bad la pynshongshit ia kane ka sngi daka jingshim bynta ki khynnah skul ba dang pule mynta bad kiba la pass haka jingshad bad jingrwai.
