Ha ka lyngkhuh sngi seng ne ka Foundation Day ba 58 ka College Kiang Nangbah Government College, Jowai kaba la lehkmen hynne ka sngi ryngkat ka jingdon bynta lang u myntri ka tnat pule puthi ka sorkar Jylla, u Rakkam A. Sangma, u MLA ka Jowai u Wailadmiki Shylla, u Lahkmen Rymbui, Chief Adviser ka sorkar Meghalaya bad u Adviser ka tnat pule puthi u HM Shangpliang, la plie ruh ia u maw sah kynmaw ba la sdang ia ka Integrated Teachers Education Programme (ITEP) ha kane ka College, kumjuh ruh la plie iaka Software jong ka College. U Rakkam Sangma haba kren u iaroh ia ka jingiaid lynti ka Kiang Nangbah Government College Jowai, kaba la jam sha 58 tylli ki snem na ka bynta ban sam jingnang jingstad.
Bad ong ruh ba ka pule puthi kam mut tang ban ioh kyrdan, ban ioh kam sorkar hynrei ka pynwandur ia ka jingim jinglong u briew, bad wanrah ruh ka jingmyntoi ha ka imlang sahlang kumba la buh thong ha ka National Education Policy (NEP) 2020, kaba la iohi jngai ban pynkhreh ia ka pule puthi ha ki spah snem ban wan. U ong ruh ba ki nonghikai ki dei ki nongpynwandur ia ka imlang sahlang bad kiba don jingkitkhlieh kumno ban iarap ia ki khynnah skul haba ia dei bad ka jingnang jingstad kumjuh ka bor sngewthuh. Nangta lyngba kane ka Integrated Teacher Education programme (ITEP) Course ki samla pule kin ioh ka jinghikai ba biang tam.
U iathuh ka sorkar ka la ialeh ban pynbit pynbiang ia ki jingdonkam ba ia dei bad ka pule puthi, ha kaba shen yn thung kam nonghikai noh ruh ha ki jaka ba lait. Haba u phai pat halor ka jingbun kiba pep skul shiteng por ha ka jylla u la wer ka jingiatreilang naduh ki nonghikai, ki nongtrei sorkar kumjuh ka imlang sahlang ban pynshlur ia kiba pep skul ba kin phai biang sha ka pule puthi khnang ban lah iakhun ia ki jingeh ha ka jingim. Ha kane ka sngi la pynkup burom ruh ia kiba ioh kyrdan PhD ba kynthup ka Dr. Sharailyn War Sohlang bad ka Dr. Saralyne Kharbhih, ka Topper ha ka Botany, ka Naina Limbu bad u Topper ha ka Physics, u Mysonity Thoo. Nangta la ioh ruh ka jingkren na u MLA ka Jowai u Wailadmiki Shylla, na u Lahkmen Rymbui, Chief Adviser ka sorkar Meghalaya bad kiwei.
