Ka Shillong ka Shlem jong ka Kolshor bad ka Shap ia ka imlang sahlang

U Myntri ka Arts & Culture u Bah Paul Lyngdoh ula buh ia u mawnongrim na ka bynta ban tei ia ka Tagore Cultural Complex ha Brookside Rilbong, Shillong ka jaka ba wan sahkai u Rabindranath Tagore.
Ha kane ka sngi la don ryngkat lang u MLA ka South Shillong Constituency u Bah Sanbor Shullai, u Commissioner & Secretary ka Arts & Culture u Bah FR Kharkongor, u Secretary ka Arts and Culture u Bah FM Dopth, u Director ka Arts & Culture u Dikki D Shira bad ki dkhot jong ka Rilbong Sports & Cultural Club.
Haba ai jingkren u Bah Paul ula ong, kane ka dei ka sngi ban sah kynmaw ban tei ia kane ka Complex bad ka jingdap shisnem ka sorkar MDA, ka long kum ka jingai sngewbha ia ki nongbud bad kiba ieit ia u Rabindranath Tagore.
U Bah Paul ula ong, ka Shillong kam dei tang ka kyrteng, jaka ne ka Nongbah hynrei ka dei ka Shlem jong ka Kolshor bad ka dei ruh ka shap jong ka jingiaid ka imlang sahlang.
Ula bynrap ka dei ka jingangnud jong ka sorkar jylla ban pynkylla ia katei ka jaka kum ka Tagore Cultural Complex khamtam haba katei ka jaka ka dei kaba u Tagore ula thoh ia ki jingthoh kiba pawnam.
U Bah Paul ula ong, ba ym dei tang u Tagore ba la wan sah ha Shillong hynrei wat u Subhash Chandra Bose bad kiwei ki riewpawnam ka Ri, ki la wan sahkai ha Shillong bad haba phai pat ha ka jylla la sakhi ba u Soso Tham ula pyndep ia ka jingthoh ia ka kot kaba pawnam ka jong u “Ki sngi barim u Hynniewtrep”.
Katba u Bah Sanbor Shullai ula iathuh ha ka por ba u shimti kum u Myntri ka Sorkar Jylla ha ka 27 tarik u Naitung, 2021 ula sdang ban shimkhia ban pynioh ia ka bhah tyngka ia kane ka project da kaba leit shaduh sha Delhi ban iakynduh ia u Myntri ka Sorkar Pdeng u Jai Kishan Reddy bad kumta la bhah tyngka ban tei ia kane ka Complex ha ka jinglut jingsep ba kot T.14.58 Klur bad ka tnad Arts & Culture ka la ioh pdiang T.5 Klur ha ka wat banyngkong ban pyniaid shakhmat ia kane ka jingtei.