Ka shnong Nongthymmai Kyndiar ka bun ki jingtei ki syiem hyndai ban khring ia ki nongshangkai pyrthei

Ka shnong Nongthymmai Kyndiar kaba hap ha ka Raid Rangnah, Khyrim Syiemship ka don bun ki jaka ba itynnad kiba lah ban khring ia ki nongwan jngohkai. Ha kane ka shnong, don ki jaka kiba don ia ka khana bad ki dak ki shin halor ka jaka sah u Syiem Hyndai, ki lynti iaid kjat u Syiem bad ka iing sah ba la ker kynroh sawdong. Katkum ka jingiathuh u Rangbah Shnong ka Nongthymmai Kyndiar, u bah Run Khonglanoh, u la ong “ka don ka jaka sah u Syiem hyndai ha u lum ba khot u Kyntiah Diengsaw. Ki don ki dak ki shin ruh kum ki maw ba shna ia ka ing, ki kynroh, tangba la don kiba la phut bad jynrat ki nongshong shnong.  Ha them ha syndan ka shnong, ka don ka pung tong um u syiem kaba long kum ka shyngoid ha ka wah Phlangjem. Ha kane ka wah, u syiem ula buh ruh ia ki dieng shna ing ba kin ym pyut bad dang shen, ki briew ka shnong, kila sei pynban noh ia ki ban pyndonkam bad mynta kim don shuh.”

U bah Run u la watla kim ioh jingtip thikna, ia u Syiem hynrei kila ngeit ba u dei u Syiem Shyllong, uba wan sah ha katei ka jaka, ha kaba ka don ka lynti hyndai kaba u Syiem u iaid ban leit iew leit hat sha Shilot, kaba la tip mynta kum ka ri Bangladesh. Ha kane ka lynti ban noh sha Shilot, ka don ka ka Raid Rangnah, Khyrim Syiemship, jaka shongthait jong u syiem bad ka mahadei jong u, kaba la shna ar tylli ki maw pyllun ba la oh bad shtah bha ba la kyrshan ki rishot maw. Tangba uwei na ki, ula khyllem noh ha madan. U Rangbah Shnong ka Nongthymmai Kyndiar, u bah Run Khonglanoh, u la pynpaw ba ka shnong ka don ka jingsngew kmen ba don kine ki jingbuh kyrpang ka mariang namar ba ki dei ka spah bah khamtam lada lah ban pynbha ban pynitynnad ban khring ia ki nongwankai pyrthei, ka ban ai jingmyntoi ia ki nongshong shnong bad kumjuh ia ka shnong.

Kham sharum kane ka jaka, la don kawei pat ka kshaid kaba la khot kum ka kshaid pungshwa ha wah thyllong.Ula ong ba kane ka shnong ka don ha sawdong ka thain ba don ka shnong Mawlynnong kaba khuid tam ha Asia, ka jingkieng jri ha Nohwet, kiba la pawnam bad khring lypa ia ki nongwankai na kylleng ka pyrthei. Khlem pep, lada lah ban pynbha ia ki, kan sa long kawei ka jaka jngohkai kaban tan bad khring ia ki nongwankai kumba long lem kiwei ki shnong ha katei ka thain. Kane ka shnong kaba dang don 25 tnum iing eiei bad ka jngai tang 15 km na surokbah.