U Chief Executive Member ka KHADC u bah Pyniaid Sing Syiem uba dei ruh u Chief Convener jong ki ADC ha Lammihngi, ula pyntip ba ka sorkar India kan wanrah ia ka 125th Amendment ka riti synshar ka ri ha u Nohprah 2024 ban wan na bynta ban pynkylla ia ka Sixth Schedule. U CEM mynta ka sngi ka 21 tarik Nailur 2024 ula pyntip ba ka KHADC ka la iakynduh ia u AK Mishra u Adviser ka tnad Home ministry ka sorkar India ba peit ia kane ka thain North East. “Ha ka jingiakynduh hynnin ka sngi ngi la ioh ban iathir iatai bha halor ka jingdawa jong ngi kaba ngi la aiti ia ka dorkhas ha ka 25 tarik Naitung ha u Myntri ka tnad Kam Pohiing u Amit Shah,” la ong u bah Pyniaid.
“Ngi la iakynduh ia u AK Mishra bad ngi iathir bha halor ka jingtyrwa ki Autonomous District Council kaba la phah halor ka 6th schedule ka riti synshar ka ri”, ula ong. U CEM ula ong ba ka sorkar India kan wanrah ia ka 125th amendment ka riti synshar ka ri ha u Nohprah 2024 ban wan, ban pynkylla ia ka Sixth Schedule. “Ngi ai khublei ia ka sorkar kaba la sngap ia ka jingai jingmut jong ngi baroh ki 10 tylli ki ADC,”ula ong.
Ha kajuh ka por, u bah Pyniaid u la ong ba ki la kren shai ba kin nym iapein bad ka nongrim ba ki la tyrwa ba ia ka jinglong kyrpang ha ka riti dustur, synshar khadar jong ka jaitbynriew kin neh kumba ju long. Katkum ka jingong u bah Pyniaid, ki la ioh khubor na u Adviser u AK Mishra ba ka sorkar India kan ialeh katba lah ban wanrah ia ka jinglong kyrpang jong ki jaitbynriew riewlum ha ka thain Lammihngi. U CEM ula ong ruh ba u AK Mishra u dei ubriew ba kongsan bha namar udei ma u uba dei u ksiang hapdeng ka jingiakren iasuk hapdeng kiba bun ki kynhun lehnoh ha ka thain Lammihngi.
