Ka sorkar ka dang iakhun ban kynriah ia baroh kiba sah ha Them Metor : Prestone

“Ngam don eiei ban kren ia ka jingbyrngem ne kynthoh ka seng kieng atiar ka Hynniewtrep National Liberation Council (HNLC), namar mynta la palat 3-4 snem ka Sorkar Jylla ka dang iakhun katba lah ban kynriah noh ia baroh kiba sah ha Them Iew Mawlong” la ong u bah Prestone Tynsong. Ia kane la ong da u Symbud Myntri Rangbah ka Jylla u Bah Prestone Tynsong ba peit ia ka tnat kam pohïing halor ka jingbuh por ka HNLC shibnai ia ka Sorkar Jylla ban kynriah ia baroh kiba sah ha Them Iew Mawlong. Kum ban pynkynmaw ha ka 9 tarik Lber ka la don ka jingbthei Bom IED ha Them Iew Mawlong ha kaba uwei u rangbah ula mynsaw bad dang shen ka HNLC ka la kam ruh ba ka donkti ban pynbtei Bom ha katei ka jaka.

Halor kane u Bah Prestone ula ong, “Baroh ki tip ba mynta la 3-4 snem ka Sorkar ka shim khia ia kane ka mat bad ka la ialeh katba lah ban pynbeit noh da ka iatreilang bad ka Harijan Panchayat Committee (HPC) bad mynta kane ka mat ka dang don hapoh ka Meghalaya High Court”.U Bah Prestone ula iathuh ka Meghalaya High Court ka dang ap ia ka jingmih na ka jingiakynduh ba khatduh hapdeng ka Sorkar Jylla bad ka HPC bad ula bynrap da ka ba ong, “Ha ka jingshisha ngi la kyrpad ia ka HPC ban pynbeit ia ka por bad tarik ban iakynduh namar wat ka Meghalaya High Court ruh ka la bthah ban pynbeit noh ia kane bad lada ym lah, ka Court kan sa leh ia ka ba donkam”.

U la bynrap ka Sorkar ka kyrmen ba shen kan don ka jingialang bad ka HPC ban shim rai khatduh haba ia dei bad ka jingthmu kynriah noh ia baroh kiba sah ha Them Iew Mawlong. Haba kylli halor ka jingsdang khie im biang ka HNLC ha Rilum Khasi-Jaintia, u Bah Prestone ula ong, “Ngan ong ia phi. Ka Sorkar ka skhem ha ka nongrim, kino kino ki kam be-ain ngim lah ban pdiang bad mynta ka Sorkar ka la bthah ia ka tnat pulit ban pynthikna ba ki jingjia ba la jia shen kim dei shuh ban jia nangne shakhmat”. U Bah Prestone ula ong, ba kino kino kiba donkti ha ki kam pyntriem ne kam beain, kin shah kem bad kin shah pynshitom da kaba tyngeh katkum ki kyndon ka ain.

“Nga kular sha ki paidbah ka Jylla ba ngi shngain. Ki Pulit kin ym thiah thait haduh ba kito kiba donkti ha ki kam beain ne kam pyntriem kin shah kem bad kin shah pynshitom katkum ki kyndon ain” la ong u Bah Prestone. Haba kylli, hato ka Sorkar ka dang khmih lynti ne em ia ka HNLC ban wan sha ka miej iakren iasuk, u Symbud Myntri Rangbah ula ong, “Ka Sorkar ka dang kyrmen bad ka dang kyntu ia ka HNLC ban pyrkhat 100 sien ban wan biang sha ka jingiakren iasuk namar mynta ka Sorkar ka la long kaba la pynkhreh ban iakren katkum ki kyndon ain”.