U MLA ka Congress u Bah Ronnie V Lyngdoh ula kyntu jur ia ka sorkar ba kan pynsted ban shna noh ia ka surok ban iaid lait na ka jingkieng dam Umiam khnang ban pyllait ia ka jingeh ki paidbah. Ka jingkhang ka sorkar ia ki kali heh ban iaid lyngba ka jingkieng Dam ka la ktah jur ia ki paidbah bad kumjuh ia ki kali ba kitmar bam mar dih namar ba ki hap iaid tawiar na Umroi shaduh Mawryngkneng ban pynhap ia ki tiar mar bam mar dih.
U bah Ronnie ula iathuh ha ki bnai ba la dep na ka liang ki MLA ki la pynlong ia ka jingjurip ia ka jingkieng dam bad ki la ai ka jingthoh sha u Symbud Myntri Rangbah uba peit ia ka tnad PWD (Road) u bah Prestone Tynsong ba un shimkhia mardor ban shna noh ia ka surok ka jingkieng kaba iaid lait na ka jingkieng dam ba mynta. “Kane ka jingkieng dam kaba la shna ha ki snem 60 ka don ha ka jingsynjor ka bym shngain. Katkum ka jingsurbe ba leh ia ka jingkieng, la lap ba kam long shngain ban iaid ki kali heh hynrei ka sorkar kam shym la leh eiei.
Dei namar kane ka daw ki MLA ki la hiar jurip ia katei ka jingkieng, bad ngi la ai jingthoh sha u Symbud Myntri Rangbahkajyllau bah Prestone Tynsong ban shna surok noh na kawei ka jaka khnang ban iaid kali shuh na katei ka jingkieng barim” ong u bah Ronnie. Lah ban kdew ba ka sorkar ka la khang ban iaid kali heh na jingkieng dam hadien ba ladep maramot NIT Guwahati bad ka la shah ban iaid ki kali tang kiba jrong kumba 12 phut eiei.
