U Symbud Myntri Rangbah ka jylla u Bah Prestone Tynsong hynne ka sngi, u la lum ka jingialang bad ki ophisar ka jylla halor ka jinglong jingman na ka jingwan ka eriong ‘Remal’ bad ula ong ka sorkar jylla la pynkhreh ia ki lad jingiada ban pynthikna ia ka jingshngaiñ ki nongshong shnong ka jylla. “Ngi la long la pynkhreh, la ka long ha ka pisa tyngka ne ka bor met lane ha kano dur ruh, ngi long kiba la pynkhreh. Ngi la bthah ia baroh ki kynhun, la ka dei ka sorkar, ki seng trei mon sngewbha ne kino kino ba don bynta lang ha ka kam haduh ki shnong ki thaw ban ai ka jingiatreilang bad ki bor sorkar” ong u Bah Prestone Tynsong haba iakren bad ki nongthoh khubor hadien ba la wai ka jingialang,
Ula bynrap katkum ka jingiathuh lypa ka long ba kane ka ‘Cyclone’ kan iai bteng haduh lashai ka sngi. Ngi lah dep ban bthah ia baroh ki DC ba kim dei ban thiah hynrei ban treikam baroh 24 kynta katba dang don kane ka Cyclone. Ha ki katto katne ki district, ngi lah ban long kiba don jingma hynrei ngi la bthah ia ki bor pyniaid district ba ki dei ban peitngor bad ba kin trei ia ki kam” ong u Symbud Myntri Rangbah.Ula ong, ba ka East Jaintia Hills, West Jaintia Hills, South West Khasi Hills, West Khasi Hills, East Khasi Hills, Eastern West Khasi Hills kin dei ki jaka kiba lah ban don ha ka jingma.
Haba kylli la ka sorkar jylla kan bthah ba dei ban phah khang khyrdep ia ki skul, u Symbud Myntri Rangbah ula ong, “Ngi lah iakren halor katei ka mat bad ngi ieh ha ka jingstad jong ki bor pyniaid district ha ryngkat ka jingiasyllok bad ki SDSEO ba kin shim ia ka rai kaba kongsan halor katei ka mat”.Ula ong, ba ka sorkar kam don eiei ban ong halor kane hynrei ka jingbthah ia ki bor pyniaid district ka long ba kidei ban shim ia ki sienjam bad ia ki rai katkum ka jingsngew donkam ka jongki. Ha kaba iadei bad ka jingshlei um namar ka jingbym don ia ki nala kiba biang, u Bah Prestone ula ong,ba ka donkam ban don ia ka jingiatreilang hapdeng jongka tnad Urban Affairs, SMB bad ka tnad PWD Roads bad ki dang iasyllok bad kin sa shim ia ki sienjam kiba kongsan halor katei ka bynta, hynrei kumba long mynta ka sorkar kala dep ban shna ia ki nala ha baroh arliang jong ki surok kiba don ha Demseiniong bad ha kylleng ki jaka ha ka nongbah Shillong.U Bah Prestone ula pyntip ruh ba ka sorkar kala dep mang T.20 Klur naka bynta kawei pa kawei ka district ban pynbiang mardor ia ki jingdonkam na ka bynta kito ki lanot kiba shah ktah na ka jingwan lynshop jongka bor mariang.
