Ka sorkar kan pyllait ia ka thain lammihngi na ka jingshlei um bad u drok: Amit Shah

U Myntri kam pohiing ka Sorkar Pdeng u Amit Shah u la ai jingkren ha ka Plenary Session kaba 71 jong ka North Eastern Council ha nongbah Shillong mynta ka sngi.
Haba ai jingkren u Amit Shah ula ong, ba ki 10 snem ba la leit hapoh ka jingialam jong u Myntri Rangbah duh u Narendra Modi ka la long kaba kongsan bha na ka bynta ka roi ka par jong ka thain shatei lammihngi ha ki 75 snem naduh ba la ioh ia ka jinglaitluid.
U la ong ba ha kine ki 10 snem hapoh ka jingialam jong u Modi ji, ym tangba ka jingjngai na ka thain shatei lammihngi sha Delhi bad ka ri baroh kawei ka la duna namar ka jingwanrah ia ki jingdon jingem, hynrei ka jingiapher ha ki jingsngew ruh ka la duna.
U la ong ba ka thain shatei lammihngi, kaba ju iakhun bad ki jingeh ba iadei bad ka jinglong tynrai, ka ktien ka thylliej, u pud u sam bad ki kynhun pyntriem, ka la ioh mad ia ka jingsdang jong ka por kaba thymmai jong ka shongsuk shongsain ha kine ki 10 snem. U Shah u la ong haba ianujor bad kine ki 10 snem na ka bynta ka thain shatei lammihngi bad ki 75 snem hadien ba ka ri ka la ioh ia ka jinglaitluid, kumta kane ka shiphew snem kalong shisha ka por ba kordor ia ka thain shatei lammihngi. U la ong ba ngi shim ia ka thain shatei lammihngi kum ka bynta kaba kongsan jong ka ri. Ha ki por jong u Atal ji, da kaba phaikhmat kyrpang, la thaw la ka jong ka tnat na ka bynta ka thain shatei lammihngi bad mynta hapoh ka jingialam jong u Myntri Rangbah duh u Narendra Modi, la pyntreikam ia lai tylli ki mantra ba kynthup ka Act East, Act Fast bad Act First. Nalor kane, la phaikhmat kyrpang sha ka thain shatei lammihngi da kaba peit bniah ia ka thain da baroh ki that Sorkar Pdeng.
U Myntri Kam Pohiing jong ka Sorkar Pdeng u la ong ba ha ki 50 snem jong ka jingseng ia ka, ka North Eastern Council (NEC) ka la kyntiew ia ki kam ba iadei bad ka roi ka par ha ka thain da kaba plie ka rynsan ba iadei bad ki polisi sha baroh ki jylla bad pynsuk ia ki lad ban pynbeit ia ki jingeh jong ki. U la ong ba ha kine ki 50 snem, la shna palat 12,000 kilometre ki surok ha kane ka thain, la sdang palat 700 MW ki jaka pynmih bording bad la plie bun ki jaka treikam kiba bha hapoh ka jingpeit jong ka NEC. U Shah u la bynrap ruh ba hapoh ka jingialam jong u Modi ji, ka bynta jong ka NEC ka la kiew hapoh ka Act East Policy. U la ong ba ha ki katto katne snem ba la leit, ka sorkar Modi ka la ioh ia ka jingjop kaba khraw ban pynbeit ia ki jingeh ba iadei bad ka shongsuk shongsain, ki kam pyntriem bad ki kam ba iadei bad u pud u sam ha kane ka thain. Nalor kane, ka la trei ruh ban kyntiew ia ka jingpyndonkam ia ka teknoloji ha ka jingpyniaid kam da kaba pyndonkam ia ka North-Eastern Space Applications Centre (NESAC). U la ong ba ka ktien ka thylliej, ka deiriti, ka bam, ka riam ka beit bad ka jingitynnad ka mariang ha ka thain shatei lammihngi kan kyntiew ia kane ka thain ha kaba iadei bad ki kam jngoh kai pyrthei.
U Amit Shah u la ong haba u Myntri Rangbah duh u Narendra Modi u la wan iashim bynta ha ka Plenary Session jong ka NEC ha u snem 2016, kalong ka sien ba nyngkong hadien 20 snem ba u Myntri Rangbah duh jong ka ri un pyniaid ia kane ka jingialang. U la bynrap ba hadien kane, u Modi ji u la wan jngoh ia ka thain shatei lammihngi palat 50 sien ha ki 10 snem ba la leit bad u la pynpaw shai ia ki jingphaikhmat kyrpang jong ka sorkar sha ka ri baroh kawei. U la ong ba ki Myntri Sorkar Pdeng ruh ki la wan jngoh ia ka thain shatei lammihngi palat 500 sien. Ka sorkar pdeng, da ka rukom treikam ‘Baroh kawei ka Sorkar’ ka la trei ban pynkhlain ia ka jingsngew sarong, ka ktien ka thylliej, ka deiriti, ki kam thoh, ka put ka tem, ki riam tynrai bad ki rukom bam jong ka thain shatei lammihngi bad ka la trei ban plié lad ia baroh kawei …