U Myntri Rangbah ka Jylla u Conrad K Sangma hynne ka sngi ula pynksan daka ba ong “Ka Sorkar Pdeng ka khlem ong ‘Em’ iaka jingdawa pyntreikam ia ka Inner Line Permit (ILP) bad iaka Meghalaya Residents Safety & Security (Amendment) Bill, 2020 hapoh Meghalaya, hynrei ka dang bishar ia kine baroh artylli”. Ia kane u Conrad ula ong hadien ka jingiai dawa ka Khasi Student Union (KSU) kaba la sdang ban pynieng iaki khyrdop talasi bad khynra iaki kot ki sla nongbylla bar Jylla.
Haba jubab ia ka jingshah kynnoh baka Sorkar Jylla ka leh sting halor ka jingdawa ILP bad MRSSA, u Conrad ula ong “Kam long kumta. Ha ka jingshisha wat mynta ruh ha ka por ba nga leit Delhi, nga la iakren ia ka ILP, ka MRSSA bad ka Eight Schedule bad u Myntri kam Pohiing Amit Shah lem bad u Home Secretary. Ngi la iakren ia kine ki kam bad ki khlem ong ‘Em’ hynrei ym pat shym la pynthikna bad ki dang shong bishar ia ka kam”. Ula kubur baka Sorkar Jylla kala dep pynshai ruh sha ka Sorkar Pdeng ba ka MRSSA kan nym ktah ia ka Article 19 jong ka Riti Synshar ka Ri.
U Myntri Rangbah ka Jylla ula pynksan halor ka MRSSA daka ba ong “Kan long kaba bakla ban ong ba ka Sorkar Jylla kam pat pyntreikam ia ka MRSSA, 2016 daka bynrap daka ba ong ” Ka jingpyntreikam kala iaid bad haba ngi iakren hangne, ka jingpynrung kyrtemg (Register) ia ki briew ba na bar kala iaid ha ki shnong bapher bapher ka Shnong bad kila thaw ruh ia ki committee”.
