Ka seng samla Wahingdoh mynta ka sngi ki la pynlong ia ka jingsam khusnam ka 30th Educational Award 2024 sha ki samla pule kiba pas bha ha SSLC bad HSSLC ha Community Hall Wahingdoh. Ha kane ka sngi u MP Lok Sabha na Shillong Parliamentary u bah Ricky Syngkon ula long kum u kongsan ha ryngkat ka jingdonlang u bah Adelbert Nongrum MLA bad u Deputy CEM ka KHADC u bah Pynshngain N Syiem. U Deputy CEM ka KHADC u bah Pynshngain haba kren ha kane ka sngi ula iaroh ia ka seng samla Wahingdoh kaba la bteng ban ai ia ka khusnam sha ki samla man u snem. U bah Pynshngain ula ong ba ka Council ka la pyrshang ban wanrah ia ka Village Administration Bill ban kynthup ia ki seng samla hynrei bun kim ia hun namar ka jingsngewthuh bakla. Hynrei la bsuh noh ia ka seng samla bad seng Kynthei shnong ha ka Administration of Elaka Amendment Act, 2024.
Ula ong ba ia kane ka Bill mynta la long ain hadien ba la ioh ka jingmynjur na u Lat ka jylla bad ha ka 14 tarik Naiwieng kan don ka jingialang kaba heh ha kaba yn ithuh bad ai bor shuh shuh ia ka Dorbar shnong,ki seng kynthei bad seng samla. U bah Pynshngain ula ong ba ka por ka donkam ban don ia ki briew kiba don ia ka jingiohi jngai bad kiba don ia ka thong, namar kumba long mynta ka ri kam don ia ka dud ka ngap namar ba ka spah ka ri ka leit shabar namar ym don ia ki nongthaw ain ba tbit. Na ka liang u MP u Dr Ricky ula ong, ba u number 30 u sei u number ban pynkynmaw ban pyndonkam ia ka jinglong ba don bun ki sap bad ka jingkmen. Ula ong ba ka nongrim kaba skhem ka dei ban tieng ia u Blei, ka jingburom ia ki kmie ki kpa bad ki nonghikai. Katba u babu RS Marbaniang uba dei u Rangbah shnong ka Wahingdoh ula ai mynsiem ia ki khynnah ba ki dei ban minot ban kiew ha ka pule puthi. Katba ka Prof. Sunita ka Shillong Commerce ka la ong ba ki samla ki dei u budlum bad u rishot ka jaidbynriew.
Ka la ong ba lada angnud ban wanrah ka roi ka par ia ka jaidbynriew ym don jingeh lada iai minot. “Ki diengpynkiang ki dei kiba pynkhlain̈ ia ka tyrpeng jong ngi hynrei ngi dei ban long kiba kut jingmut,” ka la ong. Ha kane ka juk ki don bun ki jingkylla hynrei dei ban pyniar ka jingmut jingpyrkhat bad dei ban pynproh ia ka jabieng. Halor ka National Education Policy (NEP) ka la ai mynsiem ia ki khynnah kin shim bynta bad iasoh bad ki jingpule ba la bsuh ha ka.
