Ka jingmaramot ia ka surok naduh Mawphlang shaduh Weiloi ia kaba ki paidbah ki leit wan man ka sngi shaduh Balat khappud Bangladesh bad shaduh Mawkyrwat bad kiwei ki jaka kumjuh ia basah hapdeng jong katei ka surok kynthup napdeng ki thaiñ Lyngiong, Tyrsad bad kiwei ki kmen ban iohi ba ka tnat PWD ka pynbha ia katei ka ka surok na bynta ka jingmyntoi ki paidbah. Hynrei la kynnoh ba ka jingpyntrei ban pynbha ka suki palat kat nangiaid ki sngi bad kane ka pynlong ia ki paidbah ban kynduh jingeh ha ka leit ka wan ban pyndep ia ki kam jong ki man ka sngi. Halor kane u nongialam ka Meghalaya Awaken Concern Citizen u Bah Banshai Marbaniang ula pan jingtip na ka tnad PWD Mawphlang Division lyngba ka hok wad jingtip RTI, halor ka jingpyntrei ia ka surok kynthup ka Mawphlang Cart (MC) Road bad Mawphlang-Balat (MB) Road naduh Wah Umpatiah haduh Weiloi kumba28.90 Kilometre. Ka tnad PWD ka pyntrei ia kane ka surok lyngba ka skhim “Improvement And Rehabilitation of Pavement Including Widening To Intermediate Lane”.
Katkum ka RTI la lap ka tnad PWD (Roads) Mawphlang Division ka la ai sha ki arngut ki contractor ba la tip kyrteng u Bah Bungsing Sohphoh bad I Kong Banalari Khongwir bad ia ka kam la ai mar shiteng sha kitei ar ngut ki contractor ban maramot, kata mar 14.450 Kilometre marwei ban siangrong, ia katei ka Project kumba T.50 klur bad ia ka pisa ruh la ai mar shiteng ia ki kontraktor kata mar T.25 klur. Ia ka Work Order la ai sha kitei ki contractor naduh u Kyllalyngkot, 2023 ban sdang ia ka kam bad dei pyndep hapoh 24 bnai ne ar snem, kata ki dei ban pyndep noh ha u bnai Kyllalyngkot, 2025. Ka jingpyntrei ka dei ban biang katkum ka Bituminous Macadam dei ban siang kumba long kiwei ki surok ban skhem naduh kumba 6 bynta ka jingrben ban siang rong hapdeng kasurok haduh ban pynjanai katkum ka Semi Dense Bituminous Concrete.
Halor kane ka bynta u Bah Banshai Marbaniang ula hiar ban leit jurip da lade bad lap ba kam biang ka rukom pyntrei ia kane ka surok bad ka buh jingeh ia ki paidbah nongleit nongwan bad ka bynta ba trei u Bah Bungsing Sohphoh la pynbha baroh hynrei ki don pat ki bynta ba la pait la pra bad kylla thliew, bad kyntu ia u contractor ban pynbha noh ia ki jaka ba sniew ban suk ki paidbah nongleit nongwan namar lada shu ieh tang katto ka surok ka kylla thliew lut. Katba ki bynta ban dei ban trei I Kong Banalari Khongwir ym pat sdang ban pynbha tang khyndiat ruh bad ka jingleh ki kontraktor ka buh jingeh ia ki paidbah nongleit nongwan, kumta ula kyntu ia ka kontraktor ban trei noh na bynta ka jingbit jingbiang ki paidbah bad lada ka kontraktor kam lah bad pynkhein ia ki kyndon ka tnad PWD ka dei ban pynshitom katkum ka ain ne pynduhkam noh ia ka kam bad ai ia kiwei ki lah ban trei khnang ba ki nongleit nongwan lyngba ka surok Mawphlang-Welloi-Balat kin suk.
