Ka jingialang jong ka Ka Synjuk Ki Rangbah Kur- Ka Bri U Hynñiewtrep ryngkat bad ki Rangbah Kur na thaiñ Bhoi hapoh ka jingialam jong I Bah Rangkynsai Makdoh bad Bah R K Shadap ka la long ha Conference Room jong ka Khasi Hills Autonomous District Council ban ia tai ia ki kam ki ba ia dei bad ki kur Khasi ki ba shong ba sah ha thaiñ Ri Bhoi. Ka jingthmu ba kongsan ka long ban pynshai halor ka saiñpyrkhat jong ka Synjuk ha ka ba iadei ban pyniar ia ki shnat treikam sha kylleng ka Bri U Hynñiewtrep. La ioh ka jingpynshai na ki khlieh rangbahkur jong ka Seng Kmie ba kynthup ia u Bah R L Kharpran bad Bah Aristotle Lyngdoh ba la pynbud lang da kiwei kiwei ki para rangbah bad la shahshkor ruh ia ki nia na ka liang ki rangbah kur na thaiñ Ri Bhoi ba la maitphang da ki nongialam ryngkat bad kiwei kiwei ki rangbah ba la ia synrop lang na Ri Bhoi.
Ka la don ka jingsngewkhia ka ba kyllum kumba long lem sha kiwei kiwei ki thaiñ ha ka ba la don ki riew shim kabu ban ioh myntoi ha ki ba bun ki liang lyngba ki atiar sorkar ki ba iada ia ka jinglong riewlum. Kumba long lem ha kiwei ki lympung la ia ujor pyrshah ia ka rukom shim jait jubor ki dkhar ki lyngkien da ka syrnot aiñ snap riewlum (affidavit & schedule tribe certificate) ka ba long pyrshah ia ka riti dustur tynrai. Shuh shuh la iatai sani halor ki dustur ha Ri Bhoi ba ju tip kum ka Shaw Bhoi ne ka Ring Bia bad la kubur ba ka dei ban treikam tang ha ki kur ki ba na Ri Bhoi bad ki kyndon ba pyrkhing katkum ka tynrai ka ba dei tang ia ki longiing ba la duh kpoh ne duh jait. Jar la katta la buhti ba ia ki ba bun ki riti ki ba la synrop lang ia ki Khasi bad ki Karbi ba kim dei ban kyrsum naphang, hynrei ban synrop katkum ka nongrim ba hiar pateng na ki longshwa manshwa.
Ka lympung ka pynpaw ba dang byllai ki sohkyrdot ha ki jnit ki jnat jong ka riti dustur ki ba dang dei ban iatai sani shuh shuh ha ki lympung ban dan wan. Kum shijam jong kata ka jingpyrshang, la rai ban don ka dorbar ha thaiñ Ri Bhoi ha ka 20tarik Naitung 2024 ha Nongpoh ban pynskhem ia ka shnat jong ka synjuk ha Ri Bhoi bad ban iatai ruh kiwei kiwei ki mat ba dawa kyrkieh na ka bynta ban iada ia ka jaitbynriew.
