Ka jingpynlong ka sorkar ia ka tamasa Cherry Blossom ha Bhoi Rymbong kan plie lad ia ki samla ka shnong ba kin ioh kamai na ka jingwan ki briew na kylleng ki jaka ka ri bad ka wanrah ruh ia ka roi ka par hapoh shnong ha thaw.Ha kane ka Cherry Blossom Festival ka ban long 14,15,16, ka sorkar ka la khot ia ki nongrwai nongtem ba pawnam ka ri kynthup u Akon, BoneyM, yn don ruh ki nongrwai rapper, ki nongrwai na kane ka jylla bad napoh ka ri. Ha ka jingiakren bad u Rangbah shnong ka Bhoi Rymbong u bah Taiwell Sing Rympei, ula iathuh ba ka shnong kam don kano kano ka jingiateh bad ka sorkar haba ka pynlong kum kine ki tamasa ne kino ki prokram ha madan Kurkalang, Bhoi Rymbong hynrei ka sorkar ka shu ai kum ka jingnoh synniang sha ka shnong bad ka wanrah ia ka roi ka par ha kane ka shnong. U bah Taiwell ula ong ba ka Cherry Blossom mynshem ka sorkar ka siew kumba T.3 lak eiei sha ka shnong. “Haduh mynta kam pat don kano ka jingiateh bad ka sorkar bad ka shnong ka ai tang ka NOC na bynta ba kin wanrah ia ki kam pynroi ha madan,” ula ong. Ula iathuh ba u Myntri Rangbah ka jylla mynshem ula bthah ia ka tnad jngohkai ba kan pynbiang ban peit ia ki jingdonkam ban pynbha shuh shuh ia katei ka madan bad ban ker ia ki sawdong sawkun ka madan.
“Mynta ka tnad kam jngohkai kila pynpoi ia ki tiar ki tar kiba donkam na bynta ban pynbha ia ka madan. Ngi kyrmen ba lyngba ka jingker kyroh kan itynnad ka madan bad ngi la ioh ban pynthymmai ia ki khyrdop (Gate) ar tylli bad kaba sah mynta ka long ban pynmadan ia kane ka madan. Tang shu rang hapoh shisngi arsngi yn sdang ia kane ka kam bad la kyrmen ba hapoh shi taiew yn pyndep,” ong u Rangbah shnong ka Bhoi Rymbong. Katkum ka jingiathuh u bah Taiwell ula ong ba kino kino ki kynhun kiba pynlong ia ka tamasa ha kane ka madan, lada ki dei ki nongkhaii kidei ban noh synniang. Ula ong ba ka jingpynlong ia kane ka tamasa ka khring ia ki nongwan jngohkai na kylleng ka ri bad ka long ruh kum ka lad ban aikam ai jam ia ki samla ka shnong bad ka plie lad ia ki briew ka shnong ban kamai na ka jingwan ki briew ba nabar. Na ka liang u Rangbah shnong ka Umroi Umbyrthi uba dei ruh u Chairman ka Synjuk jong ki Rangbah Shnong Umroi Pyllun u bah Pynwanbor Sylliang, ula ong ba ka jingwanrah ia ki tamasa ka iarap ban kyntiew ia ka kam jngohkai pyrthei bad ka ailad ruh ia ki trai shnong ban ai kam aijam ia ki.
“Ka jingpynlong ia ki tamasa kam don ka jingduhnong hynrei ka iarap ban ioh kamai kajih ki trai shnong,” ula ong. Halor ka jingmih ki jingkynnoh ba ka jingpynlong ia ki tamasa kadei tang ka jingpyllut phut kai sorkar ia ka pisa, u bah Sylliang ula ong ba ka sorkar haba ka pylong ia kano kano ka tamasa ka la don ki jingkhein jingdiah ia ki jingiohnong bad duhnong. U la ong, “Ngim dei than ban khim jingmut, namar ka jingthmu ka sorkar ka long ba kyntiew ia ka kam jngohkai.”
