Ka Hynniewtrep Youths Council (HYC) hynne ka sngi kala pynlong ka jingialang ban iathir halor ka jingjyllei u droks hapoh ka Jylla khamtam ha Nongbah Shillong.Lah ban kdew baka HYC kala sdang iaka thma pyrshah ia u droks naduh u bnai Jymmang 2024 bad haduh mynta kala phah sumar haduh 120 ngut ki samla ba kyrni drok sha ki Rehabilitation Centre kaba don hapoh ka Jylla Assam. Ha kane ka sngi la don lang u working president ka United Democratic Party (UDP) u Bah Jemino Mawthoh, u Nongaiktien ka Bharatiya Janata Party (BJP) u Bah Mahariom Kharkhrang, u Working President ka Khasi Hynniewtrep National Movement (KHNAM) u Bah Thomas Passah, ki Rangbah Shnong naki shnong ka Nongbah Shillong, ki longkmie, ki longkpa bad ki samla.Haba kren ha kane ka sngi u President ka HYC u Bah Roy Kupar Synrem u la iai ban baka long kaba donkam palat ban iatreilang hapdeng ki Nongialam Shnong ha baroh ki shnong ka Jylla ban tehlakam iaka jingiadie iathied bad ka jingdih drok hala ki shnong.
U Bah Roykupar u la ong ba ki Nongialam Shnong kidei ban pynkhlain iak rukom trreikam ki Dorbar Shnong bad ki Village Defense Party (VDP) ban peitngor bad ban pyrkhing iaka rung ka mih ki briew khamtam kito kiba wan na bar ka Meghalaya.U la ong baka Sorkar kadei ban pyntreikam daki kynja kyndon ain ban buddien iaki briew ba wan na bar Jylla khamtam napoh ka Jylla Manipur hashuwa ba kin sah haki shnong jong ka Nongbah Shillong. Na ka liang ka HYC ka pynbna ruh ba kan dawa naka Sorkar Jylla ban pyntreikam daka DEED (Drugs, Elimination, Enforcement and Dream Mission) ban iakhun pyrshah ia u drok hapoh ka Jylla.
Haba shim bynta ban iatai halor ka jingkyrni Drok, u Working President ka KHNAM u Bah Thomas Passah u la ong baka Sorkar kadei ban thaw kawei ka Rehabilitation Centre ka ban don lut ki jaka sumar, ki jaka hikai pyntbit (Skill Training) haki kam bapher bapher bad ki jingialehkai Sports. U Bah Thomas u la ong ruh baka Sorkar kadei ban tuklar ban bthah iaki Rehabilitation Centre ban pynduna iaka bai phah sumar iaki ba kyrni drok haki jaka sumar. Naka liang u Nongaiktien ka BJP u Bah M. Kharkhrang u la ong ba baka thma pyrshah drok kadei hi ban sdang nala iing bad dei namar kane donkam ban ai jinghikai (Awareness) iaki kmie ki kpa khnang ba kin tip, kumno ban ithuh iaki dak ki shin, lada ki khun kila sdang ban ngop ha u drok.
