Ka Hynniewtrep Youth Council (HYC) ka la iawer ia ki paidbah nongshong shnong ka Jylla ban wan sha ka jingialang bad ka Rally ban tur sha Secretariat ha ka 8 tarik Nawieng 2024. Ka jingiawer paidbah ka HYC ban tur sha Secretariat ka dei na bynta ban dawa na ka Sorkar Jylla ban pyntreikam ia ki 7 tylli ki mat ban iakhun pyrshah ia ka jingjyllei ki nongkhaii bad nongdih drok hapoh Meghalaya khamtam ha Nongbah Shillong. Ki 7 tylli ki mat ba ka HYC ka la phah sha u Myntri Rangbah ka Jylla ban iakhun pyrshah ia ka jingjyllei ki nongkhaii bad nongdih drok hapoh Meghalaya ki kynthup, ka jaka sumar lane ka Rehabilitation, ka Free Detoxification (OST) bad Day Care Centers ha ki jaka ba jyllei drok, ban thaw da ki Fast Track Courts/Special Courts hapoh ka NDPS Act, ban tohkit bad pynrem ia ki Case hapoh NDPS (NDPS) Act 1985, ban tehlakam ia ka jingkhaii drok hapoh ka Narcotic Drugs and Psychotropic Substances Act, 1988 (PIT-NDPS Act), ban thaw ki lad jingiada ban khanglad ia ka jingwan rung udrok hapoh ka Jylla bad ban wanrah ka ophis jong ka tnat Narcotics Control Bureau (NCB) ha Shillong.
Haba kren sha ki lad pathai khubor u President ka HYC u Bah Roy Kupar Synrem ula kam ba kine ki mat jingdawa ka seng ki la don lypa hapoh ka Drug Reduction Elimination and Action Mission (DREAM) ba ka Sorkar ka la pynbna naduh 2023 hynrei haduh mynta, ki jingpyntreikam kim pat paw pyrthei. UBah Roy ula kynthoh ka jingkam ka Sorkar Jylla la pyntreikam ia kam DREAM project hapoh ka Jylla ka long tang ka jingphoh sniew (Dream) namar haduh mynta ki kam kim pat paw satia ha madan. U bynrap ka Sorkar ka dei ban sngewthuh shai ba ka thma pyrshah ia u drok kam dei tang ka thma jong ka HYC hynrei ka dei jong baroh ki paidbah ka Jylla kiba don ka jingsngewkhia ia ka bha ka miat jong ka imlang sahlang.“Namar kane ka HYC kan pan ka jingkyrshan na ki paidbah ka Jylla ban iasnohkit lang bad ka seng ha kane ka thma pyrshah drok bad ban ratdyngkhong na kane ka Jylla khamtam na Nongbah Shillong” la ong u Bah Roy.
U President ka HYC ula pyntip ka Seng shuwa ba kan shim ka sienjam ba tyngeh ban pynbor ia ka Sorkar Jylla ban pyntreikam ia ki kyndon jong ka DREAM Porject ban rat ratdyngkhong ia u drok, kan pynlong shwa da ki jongialang paidbah ba baroh ki nongbah ki District hapoh Rilum Khasi-Jaintia. Ka HYC ka la rai ban pynlong shwa da ka jingialang paidbah ha ka 25 tarik Risaw ha Iew Umsning, 28 tarik ha Nongstoin, 29 tarik ha Nongpoh, 30 tarik ha Iawmusiang Jowai, 31 tarik ha Iew Mawkyrwat, 1 tarik Naiwieng ha Khliehriat, 2 tarik ha Mairang bad kiwei ki jingialang ha kylleng ki shnong ka Nongbah Shillong kum ha Mawlai, Upper Shillong, Mawprem, Rynjah bad ha Mawryngkneng.“Hadien kine ki jingialang ha ki District, ka HYC kan pynlong ia ka jingiaid paidbah ban leit tur sha Secretariat ha ka 8 tarik Naiwieng 2024 namar ia ki briew ba shong ha Secretariat ki dei hi kiba la jied da u paidbah” u la ong.
