U MP ka Congress na Tura konstiwensi u Saleng A Sangma ula ong ba ka TMC ha kane ka ilekshon MP ka khlem ai ka jingkyrshan ia u.
Haba kren sha ki lad pathai khubor u Saleng ula ong ba watla ka Congress bad ka TMC ki iadonlang ha ka kynhun I.N.D.I.A, hynrei ha kane ka ilekshon MP ym shym la don ba ai ka jingkyrshan ia u lait na ki paidbah.
“Ym don ba kyrshan ia nga, hynrei da ka jingkyrkhu u Blei bad ka jingkyrshan ki paidbah, nga la jop”ula ong.
U Saleng ula ong ruh ba ki paidbah ka Garo Hills ki dei kiba tieng ia u Blei bad ym shym la ithuh ia ki kum ki paidbah jong kano kano ka party hynrei la ithuh ia ki ba ki dei ki paidbah kiba kwah ban iohi ia ka jingkylla.
Ula ong ba kino kino ki party kim lah ban kam trai ia ki paidbah da kaba kam ba ki dei ki paidbah ka TMC ne ki paidbah ka BJP namar ki paidbah ki dei hi ki paidbah kiba kwah ia ka jingkylla bad ki la jied ia u ban wanrah ia ka jingkylla.
“Ym shym la don dak ba thoh ban pyni ba ki dei ki paidbah jong kano kano ka party namar kata ki la ai rai da kaba jied ia u kum u MP ,” ong u Saleng.
U la ong ba ka Politik ha u ka dei ka kam ban shakri ia u paidbah ym ban thok ban shukor.
