Ka tnat bording kan pynbna ban khang iaid kali na jingkieng Damsite

U Symbud Myntri Rangbah ka jylla u Bah Prestone Tynsong ula ong, ba ka jingkhang ia ki kali ban iaid na ka jingkieng Damsite ne Umiam kan long tang ha ka por ba dang bujli ia ki Bearing bad ia ka por jong ka jingkhang iaid kali yn sa pynbna paidbah da ka tnad Bording jong ka jylla. Haba iakren bad u Bah Prestone Tynsong ula iathuh ba yn khang iaka jingiaid ki kali kan dei thik tang ha ka por ba ki buh ia ki Bearing bad naka liang jong ka Technical Team kala pynpaw ba kin hap ban rah hajrong ia ka jingkieng ban buh ia ki Bearing bad kane kan bam por naduh 3 kynta haduh 7 kynta bad hadien ba lah dep buh, lah long biang ia ki kali ban iaid.

Ula iathuh, ba ka tnad Bording kan sa pyntip iaka por naduh katno baje haduh katno baje ba kin trei kam ha kaban buh ia ki Bearing khnang ba ki paidbah kiba iaid ba ieng kin ioh lypa ia ki jingtip. Ha kaba iadei bad ka jingpynkhreh ka sorkar iaka jngiaid ki kali katba dang khang ban iaid na katei ka jingkieng Umiam, u Bah Pretone ula ong, “Ia mynta shipor, la pynkhreh ba ka jingwan sha Shillong, ki kali ki lah ban iaid lyngba ka Umroi ban mih sha Mawtawar ne ban wan lyngba ka Shillong Bypass ban poi sha NEIGRIHMS, ki lah ban iaid na Umsaw ban mih sha Mawmaram bad kine kidei ki lynti kiba ngim banse shuh ban pyndonkam”.

Ula ong, ba ka don katto katne ka jingdkoh na ka bynta ki nongleit nongwan hynrei kane kam dei kaba neh shi rta hynrei kan long tang shipor katba dang pyntrei ia ka kam ban buh ia ki Bearing ha ka jingkieng Umiam bad ki paidbah kin hap ban shah shitom tang ia ka por 3 haduh 7 kynta ha ka por ba buh ia ki Bearing bad hadien kane ki kali rit kin ioh ban iaid biang na kane ka jingkieng.