U Myntri Rangbah ka Jylla u Conrad K Sangma hynin ka sngi, ula leit jurip ia ka Tura Civil Hospital bad lum ia ka jingialang ban iatai sani halor ki kam maramot bad ban wanrah ia ki tiar sumar katkum juk ba thymmai ban ai ka jingshakri ia ki paidbah.U Conrad Sangma ula iakynduh ia ki nongpang kiba leh ia ka surgery ha ka CATH lab bad ula ai khublei ia ki bor pyniaid bad ka kynhun ki doktor kiba don bynta ha ka jingleh surgery ia u klongsnam. Ki doktor ki la pynpaw ha khmat jong u Myntri Rangbah ia ka jingdonkam ban pynkha ia ka Critical Cares Unit (CCU) bathymmai na ka bynta ki nongpang klongsnam ha Tura Civil Hospital bad kumjuh ria ka jingdonkam ruh ia kiwei pat ki tiar kiba pyndonkam ha kaban ai jingsumar bad ban thungkam ia ki Paramedics bad Technician ba kin pyntyllun shakhmat ia ka kam.
“Ka dei ka jingthrang jong ka Sorkar ban kyntiew ia ki jaka ai jingsumar hapoh ka Jylla bad ngi la shimkhia ban iakren bad ki bor pyniaid jong ki hospital bapher bapher hapoh ka Jylla ban pynthikna ba ki jingtei bad ki tiar sumar kin dei kiba janai na ka bynta ban lah ban sumar bad ban ai ka jingshakri kaba kham bha ia ki nongpang” ong u Myntri Rangbah ka jylla hadien b aula de plum ia ka jingialang. Ula iathuh ba dang ar bnai mynta la dep ban pyndait ia ka Cath Lab ha Tura bad kane ka long kaba kongsan bha khamtam haba la sakhi ba namar ka jingbym don ki tiar sumar ia ki nongpang, kumta bun ki nongpang na Ri-lum Garo kila hap ban leit phah sumar shaduh sha Guwahati.
U Myntri Rangbah ula pyntip ruh ba kila don arngut ki nongpang kiba la dep leh ia ka Surgery kidei kiba la jur bha bad ka jingpynslem ban ai jingsumar iaki ka lah ban lam sha ka jingduh iaka jingim, kumta ula iaroh ia ka kynhun ki doktor kiba la lah ban leh ia ka surgery kaba jop bad iada ia ka jingim jong kine ki arngut ki nongpang.
