Ka Chief Engineer ka tnat PHE ka jylla ka kong BM Lyndem ka la pyntip paidbah, namar ka jingtyrkhong ka mariang ka um ha Dam Mawphlang kaba ju bsa umbam ia ki paidbah ha nongbah Shillong ka la hiar kynsan ha kine ki sngi. Ka la iathuh wat la ka um ka hiar ha dam Mawphlang hynrei ka rukom pynlang um kam pat ktah bad ka dang biang na bynta ki lai saw bnai ban wan.
Namar ka jinglong jingman ka mariang, ka la kyrpad ia ki paidbah ban tyngkai katba haba pyndonkam ia ka um. Ka jingtyngkai ia ka um ka long kaba donkam ban lait na ka jingkyrduh um ki paidbah ha ki sngi ban wan.
Kum ban pynpaw ka jingkylla ka mariang ha kine ki khyndiat sngi, ka long ka jingma ia ki paidbah ka jylla bad ki lah ban mad ia ka jingkyrduh umbam umdih ha ka jylla bad ka Ri baroh kawei. Namar ka jingshit ka sngi ryngkat ka jingbeh ka lyer ha kine ki sngi bun ki tyllong umbam ki la sdang ban jah rngai noh.
